|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 229 Hüküm no: 220 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hümâ Hatun’un vakf ettiği evin ulemadan Abdülbâki Efendi’ye tahsis edilmesi
Medîne-i Hazret-i Ebâ Eyyûb el-Ensârî -radiye anhu Rabbühü’l-meliki’l-Bârî-’de merhûm Cezerî Kasım Paşa mahallesinde vâki‘ bir tarafdan Mahmud Bey vakfı ve bir tarafdan Musli b. Ramazan veresesi ve bir tarafı merhûm Hasan Paşa vakfı ve taraf-ı râbi‘i tarîk-i âm ile mahdûd iki bâb fevkānî (...) bâb tahtânî odaları ve bir ahırı ve bir sofayı ve bir su kuyusunu ve zât-ı eşcâr-ı müsmire ve gayr-ı müsmire bahçeyi ve kenîfi müştemil olan menzili Hümâ Hâtun bt. Hamza nâm sâhibetü’l-hayr vakf ve haps edip süknâsı kendi yedinden sonra utekāsına ve evlâd-ı utekāsına ba‘de’l-inkırâz her gün vakt-i duhâda bir Fâtiha ile üç İhlâs-ı şerîf tilâvet edip sevâbını rûhuna hibe etmek üzre süknâya muhtâc bir recül-i âlime şart ve ta‘yîn etmekle ber mûceb-i şart-ı vâkıfe evlâd-ı utekā mutasarrıf olup ulemâdan işbu sâhibü’l-kitâb Abdülbâkī Efendi b. el-müvellâ el-merhûm Abdülfettah nâm kimesne süknâya muhtâc olduğu müte‘ayyin olmağla menzil-i mezbûrun süknâsı ber mûceb-i şart-ı vâkıfe mezbûr Abdülbâkī Efendi’ye tevcîh olunup tasarrufu için işbu hurûf gıbbe’t-taleb ketb olundu. Hurrire fi’l-yevmi’s-sâbi‘ min Zilka‘deti’ş-şerîfe li sene tis‘în ve elf.
Şuhûdü’l-hâl: (...) Efendi (...) kuzât, fahrü’l-müderrisîni’l-kirâm Mehmed Reşid Efendi, Hüseyin Çelebi b. Mehmed, Hasan b. Ömer, Abdüsselâm Efendi b. Nasuh, Ahmed Efendi ve gayruhüm.
|