|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 229 Hüküm no: 221 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Metro v. Velço’nun, emlak ve arazisini Yuvan v. Tanco’ya satması
Vilâyet-i Rumeli’nde Göllükesri kazâsına tâbi‘ İsmardeş? nâm karye ahâlîsinden Metro v. Velço nâm zimmî meclis-i şer‘-i şerîfde işbu râfi‘ü’r-rakīm Yuvan v. Tanco nâm Nasrânî muvâcehesinde ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafı Kasım b. Hasan mülkü ve bir tarafı Papa Hristo mülkü ve bir tarafı cebel ve bir tarafı tarîk-i âm ile mahdûd menzil arsasını, cemî‘ tevâbi‘i ile ve yine kurbunda vâki‘ bir tarafı Kico harmanı ve bir tarafı Hristo harmanı ve bir tarafı Yani harmanı ve bir tarafı tarîk-i âm ile mahdûd harman yerini mezbûr Yuvan’a bi safkatin vâhidetin bin fıddî râyic fi’l-vakt akçeye bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra yine karye-i mezbûre sınırı dâhilinde Berenciş nâm mahalde vâki‘ her birinin hudûdu beynimizde ma‘lûm on bir kıt‘a tarlalarımın hakk-ı tasarruflarını sâhib-i arz ma‘rifetiyle bin akçe bedel mukābelesinde mezbûr Yuvan’a tefvîz bi’l-ferâğ edip ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an iki bin akçeyi yedinden ahz ve kabz eyledim ba‘de’l-yevm emlâk-i mezbûr ile arâzi-i merkūmda alâka ve medhalim yokdur, mahallinde zabt ve tasarrufa mezbûr Yuvan’ı taslît eyledim dedikde gıbbe’t-tasdîk. Fî 7 Zilka‘de sene [11]90.
Şuhûdü’l-hâl: Huddâm.
|