.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 230
Hüküm no: 222
Orijinal metin no: [32b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sâlih Efendi b. Abdünnebi’nin Terkos’taki çiftlik ve ve arazilerini Vezir Mustafa Paşa’ya satması

Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i hatîrden mevlânâ Mehmed Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Defterî Mahmud Efendi mahallesinde işbu kitâb-ı sıhhat-nisâbın hâfızı düstûr-ı mükerrem müşîr-i müfahham nâzım-ı nizâmü’l-âlem muslih-i mesâlih-i benî Âdem yenbû‘ü’l-mehâsin ve’ş-şiyem metbû‘ü’l-meşâhir bi’l-kerem vezîr-i sânî müsâhib-i şehriyârî devletlü ve sa‘âdetlü Mustafa Paşa -yesserallâhu mâ yürîdü ve mâ yeşâ- hazretlerinin kethüdâları iftihârü’l-emâcid ve’l-ekârim câmi‘ü’l-mehâmid ve’l-mekârim Hasan Ağa b. el-merhûm Mehmed Efendi’nin sâkin olduğu menzile varıp zeyl-i vesîkada muharrerü’l-esâmî müslimîn huzûrunda akd-i meclis-i şer‘-i mübîn eyledikde mahmiye-i İstanbul’da Ördek Kasab mahallesinde sâkin umdetü’l-eşbâh Sâlih Efendi b. Abdünnebi nâm kimesnenin sulbî kebîr oğlu ve tarafından husûs-ı âti’l-beyâna vekîli olup hasm-ı câhid-i şer‘î mahzarında Yusuf Ağa b. Ebûbekir ve Mustafa Çelebi b. Pervâne şehâdetleriyle şer‘an vekâleti sâbite olan Mustafa Çelebi b. ( ) kimesne meclis-i ma‘kūd-ı mezkûrda mûmâ-ileyh Hasan Ağa hazretleri mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin babam müvekkilim mezbûrun yedinde mülkü ve hakkı olup medîne-i mezbûre müzâfâtından Terkos nâhiyesine tâbi‘ Kalkandelen nâm karyede vâki‘ lede’l-ahâlî ve’l-cîrân ma‘lûmü’l-hudûd iki ahır ve iki bâb çiftçi odası ve bir fırın ve bir anbar ve tahmînen üç dönüm bağı müştemil çiftlik ta‘bîr olunur mülk menzilini ve yine karye-i mezbûre kurbunda Türkeşe nâm karyede vâki‘ lede’l-ahâlî ve’l-cîrân ma‘lûmü’l-hudûd hâriciyyesi fevkānî iki bâb oda ve dört kebîr ve sagīr ahır ve tahtânî iki bâb oda ve bir samanlık ve bir deve ahırı ve iki dönüm bağ ve bir köşk ve bir havuz ve bir bâb dükkân ve dâhiliyyesi fevkānî ve tahtânî altı bâb oda ve bir harâbe kule ve üç anbar ve iki dönüm bağ ve bir kiler ve fırın ve hâriciyye ve dâhiliyye mâ-i cârî ve harâbe hamam ve havluyu müştemil çiftlik ta‘bîr olunur menzilini ve hâlâ içinde mevcûd sekiz re’s su sığırı öküzü ve on sekiz re’s kara sığır öküzü ve on beş re’s su sığırı ineği ve beş re’s su sığırı malağı ve on bir re’s kara sığır ineği ve bir re’s kara sığır boğası ve dört re’s kara sığır danası ve sekiz re’s kara sığır danası ve otuz üç kovan ve yüz keyl alef ve kırk burçak ve iki yüz keyl çavdar ve yüz keyl mezrû‘ buğday ve doksan keyl mezrû‘ arpa ve yüz kırk beş keyl alef ve esâs-ı beyt ve evânî-i nühâsiyye ve gayri nühâsiyye ve âlât-ı çift ve esbâb-ı hırâseti cümle hukūk ve merâfıkı ile bi safkatin vâhidetin müşârün-ileyh paşa hazretleri için mûmâ-ileyh Hasan Ağa’ya üç bin yedi yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve mûmâ-ileyh Hasan Ağa dahi ber vech-i muharrer iştirâ ve tesellüm ve kabûl ve kabz eylediklerinden sonra karyeteyn-i merkūmeteyn sınırları dâhilinde ma‘lûmü’l-hudûd ve’l-kıta‘ tahmînen iki bin dokuz keyl tohum istî‘âb eder cümle tarlaların ve iki yüz elli araba gelir çayırların ve sagīr ve kebîr beynlerinde ma‘lûm üç büyük fırının ve tahmînen üç dönüm bostan yerinin hakk-ı tasarruflarını sâhib-i arz ma‘rifetiyle iki bin kıt‘a esedî guruş bedel mukābelesinde müşârün-ileyh paşa hazretleri için mûmâ-ileyh Hasan Ağa’ya ferâğ ve tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr ile bedel-i mezkûr min haysü’l-mecmû‘ beş bin yedi yüz esedî guruş paşa-yı müşârün-ileyh hazretleri mallarından mûmâ-ileyh Hasan Ağa yedlerinden vekâletim hasebiyle bi’t-tamâm ve’l-kemâl ahz ve kabz eyledim ba‘de’l-yevm emlâk-i merkūme paşa-yı müşârün-ileyh hazretlerinin mülk-i müşterâları olmuşdur keyfe mâ yeşâ’ ve haysü mâ yehtâr mutasarrıf olup cümle arâzi ve koru ve çayır hakk-ı müfevvezleridir emsâli gibi tasarruf eylesinler dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Beşe b. Hüseyin ve Mehmed b. Mahmud nâm kimesneler ile meclis-i şer‘a gelip her biri alâ vukū‘ihi inhâ ve takrîr etmeğin mâ vaka‘a kayd şüd. Fi’l-yevmi’s-sâmin min Zilka‘deti’ş-şerîfe li sene tis‘în ve elf.


Şuhûdü’l-hâl: Fahrü’l-akrân Ahmed Ağa b. Ali, zahrü’l-eşbâh Hayyâtzâde Mehmed Ağa, Mahmud Ağa b. Mustafa, Yunus Bey b. Ali Çavuş, Mustafa Efendi b. Maden, bâzirgânbaşı Ahmed Ağa b. Abdullah.