.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 231
Hüküm no: 223
Orijinal metin no: [32b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İbrahim Çelebi b. Himmet’in evini İbrahim Ağa b. Durmuş’a satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Baba Haydar mahallesinde sâkin İbrahim Çelebi b. Himmet nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb İbrahim Ağa b. Durmuş tarafından husûs-ı âti’l-beyâna vekîl-i sâbitü’l-vekâlesi olan Ali Efendi b. Hüseyin nâm kimesne mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan bardakī el-Hâc İbrahim mülkü ve bir tarafdan müvekkil-i mezbûr İbrahim Ağa mülkü ve bir tarafdan Hamal Hüseyin mülkü ve bir tarafdan tarîk-i âm ile mahdûd bir tahtânî oda ve odunluk ta‘bîr olunur bir sagīr oda ve bi’r-i mâ ve on iki zirâ‘ damlalık arsasını ve zât-ı eşcâr-ı müsmire ve gayr-ı müsmire bahçeyi müştemil menzilimi cemî‘ tevâbi‘ ve levâhıkı ile müvekkil-i mûmâ-ileyh İbrahim Ağa’ya mahalle-i mezkûrede vâki‘ bir tarafı Mustafa Çavuş b. Receb Çavuş tarafından olan vakıf menzil ve bir tarafı Bostânî Mehmed Bey mülkü ve bir tarafı Ümmühâni Hâtun mülkü ve bir tarafı tarîk-i âm ile mahdûd iki bâb tahtânî oda ve iki sofa ve mezbûre Ümmühâni ile müşterek bi’r-i mâyı ve zât-ı eşcâr-ı müsmire ve gayr-ı müsmire bahçeyi ve içinde bir sagīr odayı müştemil mülk menzili ile beş bin yüz yirmi akçeye tarafeynden [33a] îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabûl eyledikden sonra meblağ-ı mezbûr beş bin yüz yirmi akçe ile menzil-i mahdûd-ı mezkûru ben dahi ahz ve kabz eyledim ba‘de’l-yevm benim mülküm olan menzil-i mahdûd-ı merkūm müvekkil-i mezbûr İbrahim Ağa’nın mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’t-tâsi‘ min Zilka‘deti’ş-şerîfe sene [10]90.


Şuhûdü’l-hâl: Hasan Ağa b. Abdülmennân, Hazır Bey b. Ramazan, Abdi Beşe b. Ali, Şahbaz b. Abdullah, Hasan b. Abdullah.