|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 232 Hüküm no: 224 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yusuf Ağa b. Ebûbekir’in uhdesinde olan Halep muhassıllığına ait mukâtaayı Abdülvehhab Efendi’ye devri
Husûs-ı âti’z-zikrin mahallinde ketb ve tahrîri iltimâs olunmağın savb-ı şer‘-i münîrden mevlânâ Abdüsselâm Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- de Câmi‘-i Kebîr mahallesinde sâkin umdetü’l-ekârim ve’l-e‘âlî câmi‘ü’l-mehâmid ve’l-me‘âlî Dürrî Mehmed Efendi b. Ali’nin sa‘âdet-hânelerine varıp akd-i meclis-i şer‘-i şerîf eyledikde vilâyet-i Anadolu’da sâbıkan Halebü’ş-şehbâ muhassılı olup hâlâ mahalle-i mezbûrede sâkin olan fahrü’l-akrân zahrü’l-a‘yân Yusuf Ağa b. Ebûbekir meclis-i ma‘kūd-ı mezbûrda işbu râfi‘ü’l-kitâb es-Seyyid Abdülvehhab Efendi b. Hicâzî mahzarında bast-ı merâm ve takrîr-i kelâm edip sâbıkan uhdemizde olan Haleb muhassıllığına tâbi‘ Dimos aklâmından olup bin seksen sekiz ve bin seksen dokuz senelerine mahsûb olmak üzre rüsûmâtı tedâhül tarîki ile bin doksan bir ve bin doksan ikisinde cem‘ ve tahsîl olunması lâzım gelen Âl-i Nu‘aym mukāta‘asını tarîk-i mezkûr üzre mezbûr es-Seyyid Abdülvehhab Efendi’ye üç bin esedî guruşa der-uhde ve ilzâm edip ol dahi vech-i muharrer üzre iltizâm ve kabûl eylediğinden sonra meblağ-ı mezbûr üç bin guruşdan bin yedi yüz elli guruşunu ber vech-i peşîn mezbûr es-Seyyid Abdülvehhab Efendi yedinden taraf-ı mîrî için ahz ve kabz edip zabtı için yedine ma‘mûlün-bih temessük dahi vermişimdir meblağ-ı mezkûrun bin iki yüz elli guruşu zimmetinde bâkī kalmışdır dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Beşe b. Hüseyin ve muhzır Dilâver b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’l-ibtigā ketb olundu. Fi’l-yevmi’r-râbi‘ aşer min Şevvâli’l-mükerrem li sene tis‘în ve elf.
Şuhûdü’l-hâl: Umdetü’l-ekârim ve’l-a‘yân Dürrî Mehmed Efendi b. Ali, umdetü’l-meşâyih eş-Şeyh Necib Efendi b. eş-Şeyh Şaban Efendi, mefharü’l-ekârim el-Hâc Mustafa Ağa b. Hüseyin, fahrü’l-akrân Osman Ağa b. Mehmed, Mustafa b. İbrahim el-Kâtib, Mustafa Çelebi b. Mahmud Keresteci, Hasan Ağa b. Abdurrahman, Ömer b. Mehmed, Mehmed Efendi b. Nasuh, Abdüsselâm Efendi b. Nasuh.
|