|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 233 Hüküm no: 225 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İbrahim b. Abdünnebi’ye kız kardeşi olan Âlime bt. Abdünnebi’nin terekesinden hakkının verilmesi
Mahrûse-i Galata’ya tâbi‘ kasaba-i Fındıklı’da Selim Hâtun mahallesi sâkinlerinden râfi‘ü’l-kitâb İbrahim b. Abdünnebi nâm kimesne mahfil-i kazâda medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Nişancı mahallesinde sâkine iken bundan akdem fevt olan Âlime bt. Abdünnebi nâm müteveffânın zevci ve terekesine vâzı‘ü’l-yed olan Mehmed b. Şaban nâm kimesne mahzarında üzerine da‘vâ ve takrîr-i kelâm edip müteveffât-ı merkūme Âlime ile ben li ebeveyn karındaşlar olup babamızın ismi Abdünnebi ve anamızın ismi Tenzile ve dedemizin ismi Yusuf ve maskat-ı re’sleri vilâyet-i Anadolu’da livâ-i Bolu’da On iki Dîvân kasabasına tâbi‘ Bendağzı nâm karye olup verâseti zevci mezbûr Mehmed ve sadriye sagīre kızları Emetullah ve [Ü]mmühâni’ye ve li ebeveyn kız karındaşı İsmihân nâm hâtun ile bana münhasıra olmağla müteveffât-ı merkūmenin terekesinden otuz altı sehimden iki sehim hisse-i şer‘iyyeyi tereke-i müteveffât-ı mezbûra vâzı‘ü’l-yed olan merkūm Mehmed’den taleb eylediğimde vermede ta‘allül eder suâl olunup edâsına tenbîh olunmak matlûbumdur dedikde gıbbe’s-suâl mezbûr Mehmed cevâbında müteveffât-ı merkūmenin terekesine ber vech-i muharrer vaz‘-ı yedini ikrâr müdde‘î-i mezbûr İbrahim’in vech-i meşrûh üzre verâsetini inkâr edicek müdde‘î-i mezbûrdan da‘vâsını mübeyyine beyyine taleb olundukda udûl-i ricâlden fi’l-asl karye-i mezkûreden olup hâlâ merkūme Selime Hâtun mahallesi sükkânından olan Hasan b. Beytullah ve İslâm b. Hasan nâm kimesneler li ecli’ş-şehâde mahfil-i kazâya hâzırân olup gıbbe’l-istişhâd fi’l-hakīka müteveffât-ı merkūme Âlime ile müdde‘î-i mezbûr İbrahim li ebeveyn karındaşlar babaları ismi Abdünnebi ve anaları ismi Tenzile ve dedeleri ismi Yusuf ve maskat-ı re’sleri karye-i mezkûredir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle tereke-i müteveffât-ı mezbûreden iki sehim hisse-i merkūmesini edâ ve teslîme mezbûr Mehmed’e tenbîh birle mâ vaka‘a kayd şüd. Fi’l-yevm ( ) min Zilka‘deti’ş-şerîfe li sene tis‘în ve elf.
Şuhûdü’l-hâl: Mehmed b. Eyüb, Mehmed b. Mahmud, Hasan b. Abdullah, Ali b. Abdullah.
|