.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 234
Hüküm no: 227
Orijinal metin no: [33b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âlime bt. Abdünnebi’nin terekesinin mirasçılarına taksimi

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı mahallesi sâkinelerinden iken bundan akdem fevt olan Âlime bt. Abdünnebi nâm müteveffânın verâseti zevci Mehmed b. Şaban nâm kimesne ve sadriye sagīre kızları Emetullah ve Ümmühâni ile li ebeveyn kız karındaşı İsmihân nâm hâtun ve er karındaşı İbrahim’e münhasıra olduğu şer‘an zâhir ve mütehakkik oldukdan sonra mezbûr İbrahim asâleten ve merkūme İsmihân tarafından husûs-ı âti’l-beyâna vekîl olup hasm-ı câhid-i şer‘î muvâcehesinde mezbûrenin zâtını ma‘rifet-i şer‘iyye ile ârifân olan Şaban b. Maksud ve İbrahim b. Mustafa şehâdetleriyle şer‘an vekâleti sâbite olan Mehmed b. Hüseyin vekâleten mahfil-i kazâda tereke-i müteveffât-ı merkūme Âlime’ye vâzı‘ü’l-yed olan işbu râfi‘ü’l-kitâb mezbûr Mehmed b. Şaban mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip mûrisimiz müteveffât-ı merkūme Âlime’nin mehr-i müecceli olan beş bin akçe ile sâir kalîl ve kesîr ism-i mâl ıtlâk olunur terekesi semenlerinden dört bin üç yüz altmış dokuz akçe ki cem‘an dokuz bin üç yüz altmış dokuz akçeden müvekkile-i mezbûre İsmihân’ın hisse-i şer‘iyyesine isâbet eden iki yüz altmış akçe ile merkūm İbrahim’in hisse-i şer‘iyyesine isâbet eden beş yüz yirmi akçeyi asâlet ve vekâletimiz hasebiyle tereke-i müteveffât-ı mezbûra vâzı‘ü’l-yed olan zevci merkūm Mehmed yedinden tamâmen ahz ve kabz eyledik dediklerinde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sânî aşer min Zilka‘deti’ş-şerîfe li sene tis‘în ve elf.


Şuhûdü’l-hâl: İbrahim b. Mustafa, Abdüsselâm Efendi b. Nasuh, Mehmed b. Eyüb, Mehmed b. Mahmud ve gayruhüm mine’l-huzzâr.