.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 235
Hüküm no: 228
Orijinal metin no: [33b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice bt. Hasan Ağa’nın babasından intikal eden vakıf ev hissesini kardeşi Mahmud’a satışının uygun olmayıp parasının Mahmud’a iadesi

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kiremitçi Süleyman mahallesi sükkânından iken bundan akdem vefât eden Hasan Ağa b. Mahmud’un verâseti zevcesi Sâliha bt. Abdullah ile sulbiye kebîre kızları Hatice ve Fâtıma’ya ve sulbî kebîr oğlu Mahmud’a münhasıra olup kable’l-kısmet mezbûre Sâliha dahi fevt olup verâseti sadriye kebîre kızları merkūmetân Hatice ve Fâtıma ile sadrî kebîr oğlu mezbûr Mahmud’a münhasıra olduğu lede’ş-şer‘i’ş-şerîf zâhir ve müte‘ayyin oldukdan sonra râfi‘ü’l-kitâb mezbûr Mahmud mahfil-i kazâda merkūme Hatice mahzarında üzerine da‘vâ ve takrîr-i kelâm edip mahalle-i mezbûrede vâki‘ üç tarafdan merhûm Mehmed Paşa ve Cafer Paşa evkāfı ve bir tarafdan tarîk-i âm ile mahdûd menzil mûrisimiz müteveffâ-yı evvel babamız Hasan Ağa’nın mülkü olmağla hâl-i hayâtında bin altmış bir senesi Zilka‘detü’ş-şerîfesinde vakf-ı sahîh-i şer‘î ile vakf ve haps edip süknâsı evvelâ kendiye ba‘dehû zevcesi merkūme Sâliha’ya ba‘dehâ evlâdına ile’l-inkırâz ba‘dehüm utekāsına ve evlâdlarına ba‘de’l-inkırâz bir recül-i sâliha şart ve ta‘yîn ve vakfiye-i ma‘mûlün-bihâsında tahsîs ve tahrîr ettirip lâkin babam müteveffâ-yı mezbûr menzil-i mezkûru ber vech-i muharrer vakf eylediğin benim ma‘lûmum olmamağla kız karındaşım mezbûre Hatice menzil-i merkūmda olan otuz altı sehimden sekiz sehim hisse-i şâyi‘asını mülk olmak üzre bana yedi bin beş yüz akçeye bey‘-i kat‘î ile bey‘ edip kabz-ı semen etmişidi hâlâ menzil-i mezkûrun târih-i mezbûr ile müverraha ve târih-i mezkûrda medîne-i mezbûrede hilâfeten müvellâ olan İbrahim Efendi b. Abdülhay imzâsıyla mümzât ve hatmiyle mahtûme vakfiyesi zuhûr etmek ile merkūme Hatice’den suâl olunup meblağ-ı mezbûr bana alıverilmek matlûbumdur dedikde gıbbe’s-suâl merkūme Hatice cevâbında babası müteveffâ-yı mezbûr Hasan Ağa menzil-i mezkûru târih-i mezbûrda vech-i meşrûh üzre vakf ve tescîl ettirdiğini ve vakfiye-i mezkûreyi tahrîr ettirdiğini ve menzil-i mezkûr mülk olmak üzre otuz altı sehimden sekiz sehim hissesini müdde‘î-i mezbûra yedi bin beş yüz akçeye bey‘ ve kabz-ı semen ettiğini bi tav‘ihâ ikrâr ve i‘tirâf etmeğin alâ mûcebi ikrârihî meblağ-ı mezbûru müdde‘î-i merkūm Mahmud’a edâ ve teslîme merkūme Hatice’ye tenbîh birle mâ vaka‘a bi’l-ibtigā ketb olundu. 11 fi’l-yevm min Zilka‘deti’ş-şerîfe li sene tis‘în ve elf.


Şuhûdü’l-hâl: Ahmed Çavuş b. Hüseyin el-Mübâşir, es-Seyyid Ârif Çelebi b. Mustafa, Huddâm, Abdüsselâm Efendi b. Nasuh.