.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 236
Hüküm no: 229
Orijinal metin no: [33b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sâliha bt. Mehmed’in evini Mosi v. Arslan’a satması

Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinelerinden Sâliha bt. Mehmed Hâtun meclis-i şer‘-i hatîr-i lâzımü’t-tevkīrde Kadiz cemâ‘atinden işbu râfi‘ü’r-rakīm Mosi v. Arslan nâm Yahudi muvâcehesinde bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup mahalle-i mezbûrede vâki‘ bir tarafdan Hüseyin Bey b. İbrahim mülkü ve bir tarafdan Mühürdar Mehmed Bey b. Abdi Bey mülkü ve bir tarafdan ba‘zan Hatice Hâtun ve ba‘zan Mustafa Efendi oğulları İbrahim ve İsmail mülkleri ve bir tarafdan tarîk-i âm ile mahdûd mebniye ve gayr-ı mebniye tahmînen yedi yüz on zirâ‘ zemîni hâvî bir bâb tahtânî odayı ve bi’r-i mâyı ve cüneyneyi müştemil mülk menzilimi cemî‘ tevâbi‘ ve levâhıkıyla merkūm Mosi’ye üç yüz on kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl eyledikden sonra semeni olan meblağ-ı mastûr üç yüz on guruşu mersûm Mosi yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı merkūm Mosi’nin mülk-i müşterâsı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’r-râbi‘ aşer min Zilka‘deti’ş-şerîfe li sene tis‘în ve elf.


Şuhûdü’l-hâl: İbrahim Efendi b. Murad, Mehmed Çelebi b. Ömer, Hüseyin Bey b. İbrahim, Mehmed Çelebi b. Siyavuş, Mustafa b. Murad, Mustafa b. Mehmed el-Müezzin, Mahmud Çelebi b. Mehmed, Mehmed b. Mehmed.