|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 240 Hüküm no: 235 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Ağa b. İbrahim ile Reisülküttâb Ahmed Efendi arasında su sevki dolayısıyla alacak davasında anlaşma sağlandığı
Atebe-i aliyye-i hüsrevânîde bi’l-fi‘l reisülküttâb olan umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam zü’l-kadri’r-refî‘ ve’l-izzi’l-menî‘ Ahmed Efendi b. ( ) taraf-ı bâhirü’ş-şereflerinden husûs-ı âti’l-beyâna vekîl olup hasm-ı câhid-i şer‘î muvâcehesinde Ahmed Efendi b. Mehmed Efendi ve Mehmed Ağa b. Mahmud Efendi nâm kimesneler şehâdetleriyle şer‘an vekâleti sâbite olan hazînedârları fahrü’l-eşbâh Mehmed Ağa b. Ahmed Çelebi meclis-i şer‘-i şerîfde işbu râfi‘ü’l-kitâb mefharü’l-akrân Mehmed Ağa b. İbrahim mahzarında bi’l-vekâle ikrâr-ı tâm ve takrîr-i kelâm edip mezbûr Mehmed Ağa Havâss-ı Aliyye kazâsına tâbi‘ Müderris karyesi kurbunda Kadı çayırı demekle ma‘rûf mevzi‘de bundan akdem kendi malıyla âbâr-ı müteferrika hafr ettirip cem‘ ve tahsîl eylediği üç masura ve bir çuvaldız suyun merhûm ve mağfûrun-leh Sultan Süleyman Hân binâ buyurdukları su yollarına gelince tahte’l-arzla olan lağım ve kanavât ve mecrâsı ki mûmâ-ileyh Mehmed Ağa’nın mülkü olmağla zikr olunan üç masura ve bir çuvaldız [derkenâr: işbu kayıdda olan hak tashîh içindir mühür] suyun lağım ve kanavât ve mecrâsını müvekkilim müşârün-ileyh Ahmed Efendi hazretlerine iken bin üç yüz esedî guruşa bey‘-i kat‘î ile bey‘ ve temlîk edip anlar dahi merhûm-ı müşârün-ileyh câmi‘-i şerîfleri kurbunda vâki‘ mülk menzillerinde icrâ için iştirâ ve temellük ve kabûl eyledikden sonra semeni olan meblağ-ı mastûr iki bin üç yüz guruşu mûmâ-ileyh Mehmed Ağa’ya def‘ ve teslîm ol dahi kabz ve tesellüm etmişdir hâlâ sâlifü’z-zikr suyun ancak iki masurası mevcûd kalmağla meblağ-ı mezkûrun yedi yüz elli esedî guruşunu müvekkilim müşârün-ileyh, mûmâ-ileyh Mehmed Ağa’dan taleb ve da‘vâ eylediğinde beynlerinde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynlerinde muslihûn-ı müslimûn tavassut edip müvekkilim müşârün-ileyh Ahmed Efendi’yi mûmâ-ileyh Mehmed Ağa ile beş yüz esedî guruş üzerine inşâ-i akd-i sulh eylediklerinde müvekkilim müşârün-ileyh Ahmed Efendi hazretleri dahi sulh-ı mezbûru kabûl ve bedel-i sulh olan meblağ-ı mezbûr beş yüz guruşu mûmâ-ileyh Mehmed Ağa yedinden tamâmen ahz ve kabz edip meblağ-ı ziyâde da‘vâsından ve ba‘de’l-yevm bâkī kalan iki masura su bi’l-külliye cârî olmazsa da‘vâ etmemek üzre mûmâ-ileyh Mehmed Ağa’nın zimmetini ibrâ-i âmm-ı kātı‘ü’n-nizâ‘la ibr[â] ve iskāt eyledi dedikde mûmâ-ileyh Mehmed Ağa dahi semen-i mezkûra müte‘allika âmme-i de‘âvî ve mütâlebâtdan müvekkil-i müşârün-ileyh Ahmed Efendi hazretlerinin zimmetlerini ibrâ ve iskāt eyledim dedikde ehadühümâ âharın kelimât-ı mahkiyesini vicâhen ve şifâhen tasdîk ve tahkīk etmeğin mâ cerâ bi’t-taleb kayd olundu. 18 fî Zilka‘deti’ş-şerîfe sene [10]90.
Şuhûdü’l-hâl: Ahmed Efendi el-İmâm, Mustafa Ağa b. Mahmud, Mehmed Yazıcı, Ahmed b. Abdullah tâbi‘-i İbrahim Ağa, Ebûbekir b. ( ).
|