.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 241
Hüküm no: 236
Orijinal metin no: [34b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin Çelebi b. Ahmed’in evini istiğlâl yoluylaHatice bt. Halil’e satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kiremitçi Süleyman mahallesinde sâkin Hüseyin Çelebi b. Ahmed nâm kimesne meclis-i şer‘-i şerîfde medîne-i mezbûrede vâki‘ hazret-i müşârün-ileyh evkāfından olan hamamın müste’ciri iken bundan akdem fevt olan Ömer Ağa b. Ramazan’ın eytâm-ı sıgārının tesviye-i umûrlarına kıbel-i şer‘den mansûb vasîleri ve vâlideleri olan işbu râfi‘atü’l-kitâb Hatice bt. Halil nâm hâtun tarafından husûs-ı âti’l-beyâna vekîl-i sâbitü’l-vekâle olan Mustafa Çelebi b. İbrahim mahzarında tav‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Acemzâde Mahmud Çavuş vakfı ve bir tarafı Abdullah ve İbrahim mülkleri ve bir tarafı Şâhin mülkü ve bir tarafı ba‘zan tarîk-i hâs ve ba‘zan tarîk-i âm ile mahdûd mülk menzilimi cemî‘ tevâbi‘ ve levâhıkıyla müvekkile-i merkūme Hatice Hâtun’a bi tarîki’l-istiğlâl yüz kırk yedi kıt‘a esedî guruşa bey‘ ve teslîm edip ol dahi tarîk-i mezbûr üzre sıgār-ı mezkûrûn mallarıyla ber vech-i muharrer iştirâ ve tesellüm ve kabûl eyleyip semeni olan meblağ-ı mezbûr yüz kırk yedi guruşu müvekkil-i merkūme yedinden tamâmen ahz ve kabz eylediğimden sonra yine müvekkile-i mersûme menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin yirmi altı esedî guruş ücret ile bana îcâr ve teslîm ben dahi minvâl-i muharrer üzre istîcâr ve teslîm ve kabûl eyledim dedikde gıbbe’t-tasdîki’ş-şer‘î yine medîne-i merkūmede İslâm Bey mahallesinde sâkin Arutin v. Mosi nâm Ermeni vekîl-i mezbûr Mustafa Çelebi mahzarında takrîr-i kelâm edip menzil-i mahdûd-ı mezkûrun derkine ve meblağ-ı mezkûra ve ücret-i mersûmeye emr ve kabûlü hâvî kefâlet-i sahîha-i şer‘iyye ile kefîl ve zâminim dedikde mâ vaka‘a bi’t-taleb ketb olundu kayd şüd. Fi’l-yevmi’s-sâmin aşer min Zilka‘deti’ş-şerîfe [li sene tis‘în ve elf].


Şuhûdü’l-hâl: Ahmed Efendi b. Mustafa, Mehmed Efendi b. Yusuf, Mehmed Çelebi b. Ahmed, es-Seyyid Ârif Çelebi b. Mustafa, Himmet Beşe b. Ali.