Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 352 Hüküm no: 404 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sabûhi Hatun bt. Abdullah ile kocası Mehmed Çelebi b. Abdullah’ın müşterek evlerini yarımşar hisse olarak paylaşıp tescil ettirmeleri Husûs-ı âti’l-beyânı mahallinde istimâ‘ ve tahrîr için gıbbe’l-iltimâs kıbel-i şer‘-i mutahhardan mevlânâ keşfî Mustafa Efendi b. Muharrem irsâl olunup ol dahi hâssa mi‘mârlardan üstâd Ali Bey b. Abdullah ve zeyl-i vesîkada mastûrü’l-esâmî olan müslimîn ile Mahmiye-i İstanbul’da Şehremîni çarşısı kurbunda Deniz Abdal mahallesinde vâki‘ zikri âtî menzilin üzerine varıp akd-i meclis-i şer‘-i şerîf eyledikde mahalle-i mezbûre sâkinelerinden olup zâtı mahalle-i mezbûre imâmı Abdullah Efendi b. Bostan ve Derviş Hüseyin Çelebi b. Osman ta‘rîfleriyle mu‘arrefe olan işbu bâ‘isü’l-vesîka Sabûhî Hâtun bt. Abdullah meclis-i ma‘kūd-ı mezbûrda zevci Mehmed Çelebi b. Abdullah nâm kimesne mahzarında takrîr-i kelâm edip mahalle-i mezbûrede vâki‘ bir tarafı takyeci Mehmed Çelebi mülkü ve bir tarafı dergâh-ı âlî kapıcıbaşılarından Mustafa Ağa’nın mülkü ve bir tarafı Fâtıma Hoca nâm hâtun mülkü ve bir tarafı tarîk-i âm ile mahdûd bir bâb fevkānî şehnişînli ve ocaklı oda ve önünde sofa ve dehliz ve tahtında bir bâb oklu oda ve önünde sofa ve yanında bir bâb tahtânî oklu kebîr oda ve yanında sundurma ve kenîf ve bahçe ve müşterek su kuyusunu müştemil menzilin nısfı benim mülküm ve nısf-ı âharı zevcim mezbûr Mehmed Çelebi’nin mülkü olup bu âna değin müşâ‘an mutasarrıf idik hâlâ her birimizin menzil-i mezbûrda olan nısf hisselerimiz ifrâz ve ta‘yîn ve tahsîs olunmak murâdımızdır dedikde mi‘mâr-ı mezbûr menzil-i merkūmu mezbûr Mehmed Çelebi muvâcehesinde mesâha eyledikde tûlen ve arzen bi hesâb-ı şatrancî yüz altmış altı zirâ‘ arsa üzerinde mebnî zikr olunan odalar tûlen ve arzen bi hesâb-ı mezbûr yedi yüz doksan iki zirâ‘ arsa-i hâliye oldukdan sonra zikr olunan odalardan takyeci Mehmed Çelebi tarafından vâki‘ bi hesâb-ı mezbûr seksen zirâ‘ arsa üzerinde mebnî zikr olunan fevkānî şehnişînli ve oklu oda ve sofa ve dehliz ve tahtında bir bâb ocaklı oda ve önünde sofa ve zikr olunan kebîr odanın ucunda karşısında vâki‘ müşârün-ileyh kapıcıbaşı Mustafa Ağa mülküne varınca tûlen ve arzen bi hesâb-ı şatrancî üç yüz on beş zirâ‘ bahçe arsasını ve takyeci Mehmed Çelebi ile olan müşterek su kuyusu ve müstakillen sokak kapısı ve tûlen ve arzen bi hesâb-ı şatrancî elli iki zirâ‘ kaldırım döşemesi ve sokak kapısı kurbunda vâki‘ tûlen ve arzen bi hesâb-ı mezbûr def‘a sekiz zirâ‘ kaldırım döşemesi tûlen ve arzen bi hesâb-ı şatrancî on buçuk zirâ‘ taş ve kerpiç mahlût duvarı mezbûre Sabûhî Hâtun’un nısf hissesi için ifrâz ve ta‘yîn ve tahsîs olunup bundan mâ‘adâ tûlen ve arzen bi hesâb-ı mezbûr seksen beş zirâ‘ arsa üzerinde mebnî zikr olunan ocaklı kebîr oda ve yanında tûlen ve arzen bi hesâb-ı mezbûr otuz zirâ‘ sundurma sakfı ve bi hesâb-ı mezbûr yirmi sekiz zirâ‘ taş kaldırım ve bi hesâb-ı mezbûr doksan zirâ‘ tahta havlu ve kenîf ve bi hesâb-ı mezbûr üç yüz altmış üç zirâ‘ bahçe arsası mezbûre Fâtıma Hoca tarafından vâki‘ bi hesâb-ı mezbûr otuz zirâ‘ arsa-i hâliye mezbûr Mehmed Çelebi’nin nısf hissesi için ifrâz ve ta‘yîn ve tahsîs ve beynlerine alâmât-ı fâsıla vaz‘ olunup ve her biri hisselerini bi’t-terâzi ve’l-kabûl kabz edip ve mezbûr Mehmed Çelebi Fâtıma Hoca tarafında olan arsa-i hâliyeden tarîk-i âm cânibine mürûr etmek için müstakillen sokak kapısı vaz‘ etmeğe ta‘ahhüd etmeğin vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mustafa Çelebi b. İbrahim ve Muhzır Hasan b. Mahmud ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-eimme Abdullah Efendi b. Sinan, Mustafa Beşe b. Mehmed el-Kayyım, el-Hâc Hüseyin b. Osman, Mustafa Çelebi b. ( ) el-Kazzâz, Ömer Çelebi b. Mahmud, Mustafa Çelebi b. Abdullah ve gayruhüm.