Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 354 Hüküm no: 405 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Osman b. Abdullah’ın ölümünden sonra Selime Hatun Vakfı’na ait odanın mütevelli izni ile Halil b. Selim’e verildiği Mahmiye-i İstanbul’da Hocapaşa mahallesi sükkânından iken bundan akdem vefât eden el-Hâc Osman b. Abdullah’ın sulbî kebîr oğlu Abdülbâkī nâm kimesne merhûme Selime Hâtun vakfı’ndan zikri âtî odaya vâzı‘ü’l-yed olan bâ‘isü’l-kitâb Halil b. Selim nâm kimesne ile vakf-ı mezbûr mütevellîsi olan Hasan Ağa b. Abdullah tarafından husûs-ı âti’l-beyâna sâbitü’l-vekâle vekîl olup vakf-ı mezbûrun câbîsi olan Mustafa Çelebi b. Müstakīm nâm kimesne mahzarında da‘vâ ve takrîr-i kelâm edip vakf-ı mezbûrdan olup mahmiye-i mezbûrede Demirkapı kurbunda Karaki mahallesinde vâki‘ bir tarafdan Fâtıma Hâtun menzili ve bir tarafdan Emine Hâtun menzili ve bir tarafdan tarîk-i âm ve bir tarafdan bostancı mülkü ile mahdûd bir bâb fevkānî oda müteveffâ-yı mezbûrun ile’l-vefât icâre-i mu‘accele ve müeccele ile tasarrufunda olup vefâtından sonra intikāl-i âdî ile bana intikāl etmekle tasarrufu benim hakkım iken mezbûr Halil bi gayrı hakkın vaz‘-ı yed eder suâl olunup kasr-ı yedine ve bana teslîme mezbûr Halil’e tenbîh olunmak matlûbumdur dedikde gıbbe’s-suâl mezbûr Halil cevâbında mezbûr Hacı Osman’ın vefâtından sonra müdde‘î-i mezbûr on dört yaşında olup bülûğunu i‘tirâfdan sonra zikr olunan odayı ol zamânda mütevellîsi olan Ali Bey nâm kimesnenin izni ile altı bin akçe bedel mukābelesinde bana ferâğ ve tefvîz ben dahi tefevvuz ve kabûl eylediğimden sonra bedel-i mezbûru yedimden ahz u kabz etmişidi deyû def‘le mukābele edicek gıbbe’s-suâl ve’l-inkâr mezbûr Halil’den def‘-i mezbûru mübeyyine beyyine taleb olundukda zikr olunan Karaki mahallesi sükkânından Mustafa b. Abdullah ve mahrûse-i Galata müzâfâtından kasaba-i Kasım Paşa’da Kulaksız Ahmed mahallesi sükkânından kapıcı Ahmed Bey b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Hacı Osman’ın vefâtından sonra müdde‘î-i mezbûr on dört yaşında olup bülûğunu i‘tirâfdan sonra zikr olunan oda-i mahdûdu ol zamânda vakf-ı mezbûr mütevellîsi olan Ali Bey’in izni ile altı bin akçe bedel mukābelesinde mezbûr Halil’e ferâğ ve tefvîz ve teslîm ol dahi tefevvuz ve tesellüm ettikden [sonra] bedel-i mezbûru mezbûr Halil yedinden ahz u kabz etmişidi biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup mûcebince müdde‘î-i mezbûr vech-i meşrûh üzre mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’t-tâsi‘ min şehri Recebi’l-mürecceb li sene seb‘a ve seb‘în ve elf. Şuhûdü’l-hâl: Çukadâr Hasan Beşe b. Abdullah, İbrahim b. Ahmed, Ramazan Ağa b. Mansur, Bayram Efendi b. Resul, Abbas b. Bâli, Hasan Çelebi b. Mehmed ve gayruhüm.