.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 242
Hüküm no: 238
Orijinal metin no: [35a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Dilâver’in torunu Havva için eski damadı Mustafa’dan nafaka talebinin reddi

Mahmiye-i İstanbul’da Derviş Ali mahallesinde sâkine Fâtıma bt. Dilâver nâm hâtun meclis-i şer‘-i şerîfde kızı Âişe bt. Yusuf’un zevc-i mutallıkı olan işbu râfi‘ü’l-kitâb Mustafa Ağa’nın firâşından mütevellide olup hâlâ bi hakki’l-hidâne hucr ve terbiyemde olan sadriye kızı Havva nâm sagīre babası üzerine hâkime yevmî beşer akçe nafaka farz ettirip mezbûr Mustafa Ağa zimmetinde dört senelik altmış esedî guruş nafakası müctemi‘ olmağla meblağ-ı mezbûrun mukaddemâ otuz bir guruşunu yedinden olup bâkī yirmi dokuz guruş nafakayı sagīre-i mezbûre için taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Mustafa Ağa cevâbında fi’l-vâki‘ sagīre-i mezbûre Havva’ya merkūme Fâtıma hâkime yevmî beşer akçe nafaka farz ve istidâneye izin olup lâkin mezbûre Fâtıma kendi nefsi için tabh eylediği ta‘âmdan infâk ve kendi malından iksâ edip istidâne etmemekle hâlâ şeyhülislâm hazretlerinden istiftâ eylediğimde almağa kādire olmadığını mübeyyin yedime fetvâ-yı şerîfe i‘tâ olunmağın imtinâ‘ ederim deyicek gıbbe’l-istintâk mezbûre Fâtıma fi’l-vâki‘ istidâne eylemeyip kendi nefsim için tabh eylediğim ta‘âmdan infâk ve kendi malımdan iksâ eyledim deyû bi tav‘ihâ ikrâr ve i‘tirâf etmeğin mûcebiyle mezbûre Fâtıma’yı merkūm Mustafa Ağa’ya müddet-i mezkûre için nafaka talebinden men‘ birle mâ hüve’l-vâki‘ kayd şüd. Fi’l-yevmi’l-ışrîn min Zilka‘deti’ş-şerîfe sene [10]90.


Şuhûdü’l-hâl: Cüce Yusuf Ağa b. Ali, Abdüsselâm Efendi, es-Seyyid Ârif Çelebi, Mehmed b. Eyüb.