|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 242 Hüküm no: 239 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kiremitçi Süleyman mahallesindeki evin Hüseyin Çelebi b. Ahmed’de olduğu
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kiremitçi Süleyman mahallesinde sâkin bâ‘is-i hâze’l-kitâb Hüseyin Çelebi b. Ahmed nâm kimesne meclis-i şer‘-i şerîfde takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan Acemzâde Mahmud Çavuş vakfı ve bir tarafdan Abdullah ve İbrahim nâm kimesneler mülkleri ve bir tarafdan Şâhin mülkü ve bir tarafdan ba‘zan tarîk-i hâs ve ba‘zan tarîk-i âm ile mahdûd fevkānî dört bâb odaları ve bir sofa ve bir matbah ve iki bâb tahtânî oda ve bir ahırı ve kenîfi ve bi’r-i mâyı ve bahçeyi müştemil menzil Cafer Bey b. Abdullah nâm kimesnenin mülk-i müşterâsı olup fevt olmağla menzil-i mezkûr zevcesi Fâtıma ile kızı Ümmühâni’ye isâbet edip ba‘dehû merkūme Fâtıma dahi fevt olup hasren kızı mezbûre Ümmühâni’ye isâbet edip ba‘dehû merkūme Ümmühâni dahi fevt olup menzil-i mezkûrun rub‘u ben zevci olmağın bana ve selâse erbâ‘ı sadriye kızı Afîfe’ye ve oğlu Mustafa’ya isâbet ve intikāl ettikden sonra ba‘dehû mezbûr Mustafa ve Afîfe müte‘âkiben fevt olmağla selâse erbâ‘ hisse-i mezkûreleri bi’l-inhisâr bana isâbet ve intikāl edip târih-i kitâba gelince kırk elli seneden beri menzil-i mezkûru mâlikâne minvâl-i muharrer üzre zabt edegelmişlerdir vâki‘ hâl mahalle-i mezbûre sükkânından olup hâzırûn bi’l-meclis olan Mehmed Efendi b. Yusuf ve Ahmed Çelebi b. Mehmed ve Mehmed Çelebi b. Ahmed Bey ve Veli Bey b. Mehmed nâm kimesnelerin ma‘lûmları olmağın suâl olunup takrîrleri tahrîr olunmak matlûbumdur dedikde gıbbe’s-suâl merkūmûn Mehmed Efendi ve Ahmed Çelebi ve Mehmed Çelebi ve Veli Bey cevâblarında fi’l-hakīka hâl ve kaziyye mezbûr Hüseyin Çelebi’nin bâlâda bast ve tafsîl eylediği minvâl üzre olup menzil-i mezkûru târih-i kitâba gelince kırk elli seneden beri minvâl-i meşrûh üzre zabt olunduğu dahi ma‘lûmumuzdur deyû her biri haber vermeğin mâ cerâ hıfzan li’l-makāl bi’l-ibtigā ketb olundu. Fi’l-yevmi’l-hâmis aşer min Zilka‘deti’ş-şerîfe li sene tis‘în ve elf.
Şuhûdü’l-hâl: Ahmed Efendi b. Mustafa el-İmâm, Ahmed Beşe b. Hüseyin, Hasan b. Abdullah, Mehmed b. Eyüb, Ali b. Abdullah, Mahmud b. ( ), Mehmed b. Mahmud, Dilâver b. Abdullah.
|