|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 243 Hüküm no: 240 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Pavlo v. Hristo’nun bağını Pavlo v. Petro’ya satması
Vilâyet-i Rumeli’nde Sarıgöl kazâsına tâbi‘ İvranca nâm karye ahâlîsinden Petro v. Hristo nâm zimmî meclis-i şer‘-i şerîfde işbu râfi‘ü’r-rakīm Pavlo v. Hristo nâm zimmî muvâcehesinde ikrâr ve i‘tirâf edip silk-i mülk-i sahîhimde münselik olup kazâ-i mezbûre tâbi‘ Maro nâm karyede vâki‘ bir tarafı Mitan zimmî bağı ve bir tarafı İzmirli dâmâdı Mano zimmî mülkü ve bir tarafı Manto zimmî bağı ve bir tarafı tarîk-i âm ile mahdûd iki dönüm ve yol üstünde bir tarafı Mustafa bağı ve bir tarafı Zerino zimmî bağı ve bir tarafı Yanko zimmî bağı ve bir tarafı tarîk-i âm ile mahdûd ve bir dönüm ki cem‘an üç dönüm iki kıt‘a mülk bağımı, cemî‘ tevâbi‘i ile mezbûr Pavlo’ya kırk esedî guruşa bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr kırk esedî guruşu yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan üç dönüm bağda alâka ve medhalim yokdur, mezbûr Pavlo’nun mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûru taslît eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: Süleyman b. Abdullah, Huddâm.
|