.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 244
Hüküm no: 241
Orijinal metin no: [35b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden İvaz b. Merdan’ın eşyalarının hizmetinde olduğu Cüce Yusuf Ağa tarafından mirasçısına verilmesi gerektiği

Fi’l-asl vilâyet-i Rumeli’nde Eski Cum‘a kazâsında Aşağı mahallesi sâkinelerinden olup hâlâ medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kiremitçi [derkenâr: Tashîh olunup darb olunmuşdur] Süleyman mahallesinde müsâfiren sâkine olan işbu râfi‘ü’l-kitâb Afîfe bt. Merdan nâm hâtun mahfil-i kazâda mahalle-i mezbûre Kiremitçi Süleyman sükkânından Cüce Yusuf Ağa b. Ali mahzarında üzerine da‘vâ ve takrîr-i kelâm edip fi’l-asl zikr olunan Aşağı mahalle sâkinlerinden olup mezbûr Yusuf Ağa’nın hizmetinde iken bundan akdem fevt olan İvaz b. Merdan benim li ebeveyn karındaşım olup terekesi hasren bana isâbet ve intikāl etmekle tereke-i müteveffâ-yı mezbûrdan mezbûr Yusuf Ağa’nın makbûzu olup mevcûd bi’l-meclis olan bir sipah? kılıç ve bir neftî çuka dolama ve bir mâî şalvar ve bir sîm bıçak ve bir hamayil mezbûr Yusuf Ağa bana teslîm edip yine tereke-i müteveffâ-yı mezbûrdan dört yüz seksen akçe kıymetli bir sîm kuşak ve on altı guruş kıymetli bir hançer ve ikisi sekiz yüz akçe kıymetli üç dolama ve altı yüz akçe kıymetli iki kırmızı çuka çakşır mezbûr Yusuf Ağa’nın yedinde kalmışdır suâl olunup mevcûd ise aynını değil ise kıymetini bana teslîm ve edâya tenbîh olunmak matlûbumdur dedikde gıbbe’s-suâl mezbûr Yusuf Ağa cevâbında fi’l-hakīka müdde‘iyye-i mezbûre Afîfe müteveffâ-yı merkūmun li ebeveyn kız karındaşı olup mezbûrdan gayrı zâhirde vâris-i ma‘rûfu olmamağla işbu mevcûd bi’l-meclis olan eşyâsını teslîm ettim ve tereke-i müteveffâ-yı mezbûrdan olup kıyem-i mesfûre ile makbûza olan sîm kuşak ve hançer ve üç dolama ve çakşırları dahi yedimde idi lâkin mahrûse-i Edirne’de Hacı Sarraf mahallesinde sâkine olup bundan akdem tatlîk ettiğim Fâtıma nâm hâtunun menzilinde bırakıp geldim deyû tav‘an ikrâr etmeğin alâ mûcebi ikrârihî eşyâ-i muharrere-i mezkûre mevcûd ise aynını değil ise kıymetlerini müdde‘iyye-i merkūme Afîfe’ye edâ ve teslîme mezbûr Cüce Yusuf Ağa’ya tenbîh birle mâ vaka‘a kayd şüd. Fi’l-yevmi’t-tâsi‘ min Zilka‘deti’ş-şerîfe li sene tis‘în ve elf.


Şuhûdü’l-hâl: Es-Seyyid Ârif Çelebi b. Mustafa, Abdüsselâm Efendi b. Mustafa, Ahmed Beşe b. Hüseyin Çukadâr, Hasan b. Abdullah.