.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 245
Hüküm no: 242
Orijinal metin no: [35b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İvaz b. Merdan’ın terekesinin hak sahiplerine taksimi

Vilâyet-i Rumeli’nde Eski Cum‘a kasabasında Aşağı mahallesi sâkinlerinden işbu râfi‘ü’l-kitâb Durmuş b. Merdan nâm kimesne mahfil-i kazâda fi’l-asl yine mahalle-i mezbûre sâkinelerinden olup hâlâ medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kiremitçi Süleyman mahallesinde müsâfiren sâkine olan Afîfe bt. Merdan nâm hâtun mahzarında üzerine da‘vâ ve takrîr-i kelâm edip sâlifü’z-zikr Kiremitçi Süleyman mahallesinde sâkin hâzır bi’l-meclis Cüce Yusuf Ağa b. Ali nâm kimesnenin hizmetinde iken bundan akdem fevt olan İvaz b. Merdan nâm müteveffânın terekesinden nısfı farziyyet ile li ebeveyn kız karındaşı merkūme Afîfe’ye ve bâkīsi usûbet ile bana isâbet ve intikāl etmişiken, mezbûre Afîfe mecmû‘-ı tereke-i müteveffâ-yı mezbûra hasren vârisi olmak üzre vâzı‘atü’l-yed olup eşyâ-i mezkûrenin nısfını bana teslîmden imtinâ‘ eder suâl olunup eşyâ-i muharrere-i mezbûrenin nısfını bana teslîme tenbîh olunmak matlûbumdur dedikde gıbbe’s-suâl merkūme Afîfe cevâbında fi’l-hakīka müteveffâ-yı mezbûr İvaz benim li ebeveyn er karındaşım olmağla eşyâ-i muharreresine ber vech-i mübeyyen vaz‘-ı yed etmişidim lâkin merkūm Durmuş dahi benim ile ve müteveffâ-yı merkūm İvaz ile li eb karındaşlar olup babamız ismi Merdan ve dedemiz ismi Cafer ve maskat-ı re’simiz sâlifü’l-beyân Aşağı mahalledir deyû bi tav‘ihâ ikrâr ve i‘tirâf etmeğin alâ mûcebi ikrârihâ eşyâ-i muharrere-i mezbûrenin nısfı merkūm Durmuş’a teslîme mezbûre Afîfe’ye tenbîh birle mâ hüve’l-vâki‘ kayd şüd. Fi’l-yevmi’l-ışrîn min Zilka‘deti’ş-şerîfe sene 1090.


Şuhûdü’l-hâl: Abdüsselâm Efendi b. Nasuh, es-Seyyid Ârif Çelebi b. Mustafa, Ahmed Beşe b. Hüseyin, Hasan b. Abdullah.