.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 246
Hüküm no: 244
Orijinal metin no: [36a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Gülistan’ın cariyesi olduğunu iddia eden Âişe bt. Hasan’ın davasının reddi

Fi’l-asl vilâyet-i Anadolu’da medîne-i Sinop’da Demirli mahallesi sâkinelerinden olup hâlâ mahmiye-i İstanbul’da Kefeli mahallesinde müsâfiren sâkine olan Âişe bt. Hasan nâm hâtun mahfil-i kazâda medîne-i Hazret-i Ebâ Eyyûb Ensârî’de Kiremitçi Süleyman mahallesinde sâkine işbu râfi‘atü’l-kitâb Gülistan bt. Abdullah mahzarında üzerine da‘vâ ve takrîr-i kelâm edip merkūme Gülistan bundan akdem fevt olan ceddem Hümâ Hâtun’un câriye-i memlûkesi olup ba‘de vefâtihâ benim hisseme isâbet etmişiken, ben sagīre kalmağla mezbûre Gülistan firâr etmişidi hâlâ sâlifü’z-zikr Kiremitçi Süleyman mahallesinde sâkine Solakzâde kayınanası nâm hâtunun menzilinde[dir] suâl olunup takrîri tahrîr ve bana rıkkıyyete inkıyâda tenbîh olunmak matlûbumdur dedikde gıbbe’s-suâl merkūme Gülistan cevâbında ben müdde‘iyye-i mezbûre Âişe’nin ceddesi merkūme Hümâ Hâtun’un câriye-i memlûkesi olup hâl-i hayâtında fevtinden kırk gün mukaddem âzâde olmak üzre beni müdebbere edip mezbûre Hümâ Hâtun fevtinden kırk gün mukaddem sıhhatde bulunmak ile merkūmenin malından âzâd olup ve ber vech-i muharrer âzâd olduğumu müdde‘iyye-i mezbûre Âişe’nin vasîsi Bedrimâh Çelebi nâm kimesne muvâcehesinde bin yetmiş iki senesi Zilka‘desinde medîne-i Sinop’da mesned-nişîn-i şerî‘at-ı garrâ olan es-Seyyid Hibetullah Efendi b. es-Seyyid Seyfullah huzûrunda şuhûd-ı udûl ile isbât edip yedime hüccet vermişdi deyû târih-i mezkûr ile müverraha ve mûmâ-ileyh es-Seyyid Hibetullah Efendi imzâsıyla mümzât ve hatmiyle mahtûm hüccet-i şer‘iyye ibrâz edip müdde‘iyye-i merkūme Âişe muvâcehesinde feth ve kırâat olundukda mazmûnu merkūme Gülistan’ın takrîr-i meşrûhuna mutâbık bulunmağın isre’l-istintâk müdde‘iyye-i mezbûre Âişe benim hâl-i sıgārımda vasîm olan mezbûre Bedrimâh Çelebi’nin muvâcehesinde isbât etti ammâ ben tutmam deyû mazmûn-ı hüccet-i mersûmeyi bi tav‘ihâ ikrâr ve i‘tirâf etmeğin alâ mûcebi ikrârihâ merkūme Gülistan ile bî-vech mu‘ârazadan müdde‘iyye-i mezbûre Âişe’yi men‘ birle mâ vaka‘a kayd şüd. Fi’l-yevmi’l-ışrîn min Zilka‘deti’ş-şerîfe sene [10]90.


Şuhûdü’l-hâl: Abdüsselâm Efendi b. Nasuh, Ali Beşe b. Veli el-Mübâşir, es-Seyyid Ârif Çelebi b. Mustafa, Huddâm.