|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 247 Hüküm no: 245 Orijinal metin no: [36a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Âişe bt. Mehmed ile boşandığı kocası Receb b. Hüseyin’in borç hususunda sulh olması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Evlice baba mahallesinde sâkine Âişe bt. Mehmed nâm hâtun meclis-i şer‘-i şerîfde zevc-i mutallıkı işbu râfi‘ü’l-kitâb Receb b. Hüseyin nâm kimesne mahzarında bi tav‘ihâ ikrâr-ı tâm ve takrîr-i kelâm edip mezbûr Receb benim zevcim olup hâlâ beni tatlîk etmekle zimmetinde mütekarrir ve ma‘kūdun-aleyh olan dört yüz akçe mehr-i müeccel hakkım ile nafaka-i iddet-i mu‘ayyenem ve me’ûnet-i süknâm mukābelesinde olan üç yüz akçe ki [cem‘an] yedi yüz akçeyi mersûm Receb’den taleb [ve] da‘vâ eylediğimde beynimizde muslihûn-ı müslimûn tavassut edip meblağ-ı mezkûr da‘vâsından merkūm Receb ile beni iki yüz akçe üzerine akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezbûru merkūm Receb’den tamâmen ahz ve kabz edip hukūk-ı zevciyyete ve meblağ-ı mezkûra müte‘allika âmme-i da‘vâdan mersûm Receb’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-hâdî ve’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: Mehmed b. Ali, Hüseyin b. Ahmed, Ali b. İslâm, Hasan b. Mustafa, Veli b. Mustafa ve gayruhüm.
|