.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 247
Hüküm no: 246
Orijinal metin no: [36a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Emine bt. Abdullah ile boşandığı kocası Seyfullah b. Abdullah’ın borç konusunda anlaştıkları

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Baba Haydar mahallesinde sâkine Emine bt. Abdullah nâm hâtun meclis-i şer‘-i şerîfde zevc-i mutallıkı işbu râfi‘ü’l-kitâb Seyfullah b. Abdullah mahzarında bi tav‘ihâ ikrâr ve takrîr-i kelâm edip mezbûr Seyfullah zevcim olup hâlâ beni tatlîk etmekle zimmetinde mütekarrir ve ma‘kūdun-aleyh olan mehr-i müecceli hakkım ile nafaka-i iddet-i mu‘ayyenem ve me’ûnet-i süknâm mukābelesinde üç yüz akçe ki cem‘an bin üç yüz akçeyi mezbûr Seyfullah’dan taleb ve da‘vâ eylediğimde beynimizde muslihûn-ı müslimûn tavassut edip merkūm Seyfullah ile beni dört aded beyaz bogasi üzre münakkaş yastık yüzü üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan sâlifü’z-zikr yastık yüzlerini merkūm Seyfullah yedinden [36b] ahz ve kabz edip hukūk-ı zevciyyete müte‘allika âmme-i da‘vâdan mezbûr Seyfullah’ın zimmetini ibrâ ve iskāt edip ol dahi benim zimmetimi hukūk-ı zevciyyete müte‘allika cemî‘ da‘vâdan ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-ışrîn min Zilka‘deti’ş-şerîfe sene [10]90.


Şuhûdü’l-hâl: Mustafa Halîfe b. ( ) Müezzin, İbrahim Beşe b. Abdullah, Muhtesib Ahmed Çelebi b. Mehmed, Hasan Çelebi b. Hüseyin ve gayruhüm.