|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 248 Hüküm no: 247 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa Efendi’nin vakf ettiği nakdin nâzırı olup vefat eden Şeyh Abdullah b. Yakub’un Baba Haydar Vakfı’na olan borcunun ödendiği
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Baba Haydar mescid ve zâviyesinde berât-ı âlîşân ile bi’l-fi‘l mütevellî olan Ahmed Çelebi b. el-Hâc Mustafa nâm kimesne meclis-i şer‘-i şerîfde zâviye-i mezkûrede şeyh ve zâviye-i mezkûreye merhûm Mustafa Efendi nâm sâhibü’l-hayrın nukūd-ı mevkūfesine ber mûceb-i şart-ı vâkıf nâzır iken bundan akdem fevt olan eş-Şeyh Abdullah Efendi b. Yakub’un zevce-i menkûhası ve terekesine vâzı‘atü’l-yed olan işbu râfi‘atü’l-kitâb Fâtıma bt. Abdullah nâm hâtun tarafından husûs-ı âti’l-beyâna vekîl olup hasm-ı câhid-i şer‘î muvâcehesinde mezbûrenin zâtını ma‘rifet-i şer‘iyye ile ârifân olan Mustafa Halîfe b. Musa ve Hasan Çelebi b. Hüseyin şehâdetleriyle şer‘an vekâleti sâbite olan el-Hâc Hasan b. Ahmed nâm kimesne mahzarında bi’t-tevliyye ikrâr-ı tâm ve takrîr-i kelâm edip zâviye-i mezkûre vâkıf-ı müşârün-ileyhin vakfı olup müteveffâ-yı mezbûr eş-Şeyh Abdullah Efendi’nin nezâret-i mahkiyesi hasebiyle hâl-i hayâtında makbûzu olan otuz bin akçe olmak üzre iki yüz elli esedî guruşun yetmiş beş guruşu ile mescid-i mezkûr etrâfında müteveffâ-yı müslimîn defni için âhara bey‘ ettiği arsaların beyne’l-ahâlî ma‘lûmü’l-mikdâr akçelerini müteveffâ-yı mezbûr Abdullah Efendi hâl-i hayâtında hasbe’l-iktizâ mescid [ve] zâviyenin ta‘mîr ve termîmine şey’en fe-şey’en harc ve sarf edip yüz yetmiş beş esedî guruşu üzerinde kalmışidi hâlâ tevliyyet-i mahkiyem hasebiyle meblağ-ı bâkī-i mezkûr yüz yetmiş beş guruşun altmış bir buçuk esedî guruşunu nakl-i tereke-i müteveffâ-yı mezbûra vâzı‘atü’l-yed olan müvekkile-i merkūme Fâtıma Hâtun yedinden ahz ve kabz edip bâkī yüz on üç buçuk guruş zimem-i nâsdan vekîl-i mezbûr el-Hâc Hasan yerli yerinden bana şerâit-i sıhhati müstecmi‘ havâle-i sahîha ile havâle ve rihânını tamâmen def‘ ve teslîm edip ben dahi kabz ve kabûl eyledim min ba‘d meblağ-ı bâkī-i mezkûr yüz yetmiş beş guruşdan ve müteveffâ-yı mezbûrun hâl-i hayâtında vech-i meşrûh üzre âhara bey‘ ettiği arsa akçelerinden terekesinde ve veresesinde ve üzerlerinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: Hasan Ağa b. Abdullah, fahrü’l-kuzât Abdullah Efendi Kevnîzâde, el-Hâc İbrahim b. Mehmed, el-Hâc Halil b. Mehmed, İsmail Bey b. Mustafa, Mustafa Çelebi b. İbrahim, Hasan Efendi b. Veli.
|