.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 249
Hüküm no: 248
Orijinal metin no: [36b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hacı Ali b. Muhyiddin’in, evini İvaz Beşe b. Abdullah’a satması

Mahmiye-i İstanbul’da Kırkçeşme mahallesinde sâkin el-Hâc Ali b. Muhyiddin meclis-i şer‘-i şerîfde işbu râfi‘ü’l-kitâb İvaz Beşe b. Abdullah mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup Havâss-ı Aliyye kazâsı a‘mâlinden Çatalca nâhiyesine tâbi‘ Baba Nakkāş nâm karyede vâki‘ bir tarafı Müezzin Hüseyin Halîfe mülkü ve bir tarafı Âişe nâm hâtun mülkü ve iki tarafı tarîk-i âm ile mahdûd iki bâb fevkānî oda ve bir anbar ve fırın ve ahır ve sundurma ve bir tahtânî sagīr oda ve bi’r-i mâ ve tahmînen iki dönüm bağı müştemil mülk menzilimi cemî‘ tevâbi‘ ve levâhıkı ile mezbûr İvaz Beşe’ye otuz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve kabz ve kabûl eyledikden sonra semeni olan meblağ-ı mezbûr otuz bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur, mezbûr İvaz Beşe’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’s-sâlis ve’l-ışrîn min Zilka‘deti’ş-şerîfe li sene tis‘în ve elf.


Şuhûdü’l-hâl: Mehmed b. İbrahim, Şâhin b. Abdullah, Mehmed b. Eyüb, Mehmed b. Mahmud, Ali b. Abdullah.