.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 249
Hüküm no: 249
Orijinal metin no: [36b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mümine bt. Ali’nin ev ve dükkânlardaki hakkını kardeşi Hacı Mustafa b. Ali’ye satması

Fi’l-asl Havâss-ı Aliyye kazâsına tâbi‘ kasaba-i Ereğli’de sâkine olup hâlâ mahmiye-i İstanbul’da Saraçhâne başında sâkine olan Mümine bt. Ali nâm hâtun meclis-i şer‘-i şerîfde li ebeveyn er karındaşı işbu râfi‘ü’l-kitâb el-Hâc Mustafa nâm kimesne mahzarında bi tav‘ihâ ikrâr-ı tâm ve takrîr-i kelâm edip silk-i mülkümde münselik olup kasaba-i mezbûrede vâki‘ bir tarafdan Süleyman Hoca mülkü ve bir tarafdan Tiryaki Mustafa mülkü ve bir tarafdan Kahveci Mehmed mülkü ve bir tarafdan ba‘zan Toygar oğlu Mehmed mülkü ve ba‘zan tarîk-i âm ile mahdûd mülk menzilde olan üç sehimden bir sehim hisse-i şâyi‘am ile yine kasaba-i merkūmede vâki‘ bir tarafı cidâr-ı hamam ve bir tarafı Hacı Mehmed’in berber dükkânı ve tarafeyni tarîk-i âm ile mahdûd bir bâb kahveci dükkânında olan üç sehimden bir sehim hisse-i şâyi‘amı dahi cemî‘ hukūk ve merâfıkı ile karındaşım mezbûr el-Hâc Mustafa’ya bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi safkatin vâhidetin bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr bin beş yüz akçeyi karındaşım mezbûr el-Hâc Mustafa yedinden tamâmen ahz ve kabz eyledim ba‘de’l-yevm zikr olunan menzil ve dükkânda olan sülüs hisse-i şâyi‘alarım mezbûr Mustafa’nın mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene tis‘în ve elf.


Şuhûdü’l-hâl: Mehmed Hoca b. Ali, Mehmed b. Ahmed, Nurullah b. Receb, Mehmed b. Ali, Yusuf b. Abdullah, Ali b. Ahmed, Mehmed b. Hızır, Ramazan b. Şaban.