|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 250 Hüküm no: 250 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İmam İshak Efendi’nin vârislerinin ev tarla ve çayırlarını Fâtıma bt. Abdullah’a satması
Mahmiye-i İstanbul’da Cafer Ağa mahallesi sâkinlerinden iken bundan akdem fevt olan İmâm İshak Efendi b. Yusuf’un verâseti sulbiye kebîre kızları Âişe ve Fâtıma ile sulbî kebîr oğulları Abdullah ve İbrahim’e münhasır olduğu şer‘an zâhir ve mütehakkik oldukdan sonra mezbûrân Abdullah ve İbrahim asâleten ve merkūmetân Âişe ve Fâtıma taraflarından husûs-ı âti’l-beyâna vekîl olup hasm-ı câhidi şer‘î muvâcehesinde merkūmetânın zâtlarını ma‘rifet-i şer‘iyye ile ârifân olan Hasan b. Mehmed ve Mehmed b. Şaban nâm kimesneler şehâdetleriyle şer‘an vekâleti sâbite olan Belkıs bt. Abdullah nâm hâtun vekâleten meclis-i şer‘-i hatîr-i lâzımü’t-tevkīrde işbu râfi‘atü’l-kitâb Fâtıma bt. Abdullah nâm hâtun mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip Havâss-ı Aliyye müzâfâtından Terkos nâhiyesine tâbi‘ Ayvad Ali nâm karyede vâki‘ bir tarafdan Hasan mülkü ve bir tarafdan su kemeri ve bir tarafdan ba‘zan su kemeri ve ba‘zan mekābir-i müslimîn ve bir tarafdan tarîk-i âm ile mahdûd saz örtülü bir oda ve bir ahır ve bahçeyi müştemil mülk-i mevrûs menzilimizi cemî‘ tevâbi‘i ile merkūme Fâtıma’ya on üç kıt‘a esedî guruşa bey‘-i kat‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra yine karye-i mezbûre sınırı dâhilinde vâki‘ bir tarafı mekābir-i kefere ve bir tarafı kavaklık ve bir tarafı dere ve bir tarafı tarîk-i âm ile mahdûd birbirine muttasıl iki kıt‘a tarla ve yine bir tarafdan orman ve bir tarafdan cebel ve bir tarafdan tarîk-i âm ile mahdûd birbirine muttasıl iki kıt‘a tarla ve bir kıt‘a çayırımızın hakk-ı tasarruflarını ma‘rifet-i sâhib-i arz ile merkūme Fâtıma’ya yedi esedî guruş bedel mukābelesinde tefvîz ve ferâğ ol dahi tefevvuz ve kabûl eyledikden sonra semen-i mezbûr ile bedel-i mezkûr cem‘an yirmi guruşu merkūme Fâtıma yedinden tamâmen ahz ve kabz eyledik ba‘de’l-yevm zikr olunan menzil ve tarla ve çayırı mezbûre Fâtıma keyfe mâ yeşâ’ mutasarrıfe olsun dediklerinde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sâdis ve’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: Ahmed Çelebi b. Mehmed Efendi, Hasan b. Abdullah, Mehmed b. Eyüb, Mehmed b. Mahmud, Ali b. Abdullah ve gayruhüm.
|