|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 251 Hüküm no: 251 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yusuf Bey b. Hüseyin’in gece bir eve girerken kendisini yakalamaya gelen Yusuf b. Abdullah’ı bıçakla yaralaması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Davud Ağa mahallesinde sâkin işbu râfi‘ü’l-kitâb Yusuf b. Abdullah nâm kimesne mahfil-i kazâda mahmiye-i İstanbul hısnı ebvâbından Topkapısı hâricinde sâkin diğer Yusuf Bey b. Hüseyin nâm kimesne mahzarında üzerine da‘vâ ve takrîr-i kelâm edip merkūm diğer Yusuf Bey işbu târih-i kitâb gecesi vakt-i işâda mahalle-i mezbûrede sâkine Nevcivan Hâtun’un menzilinin duvarından aşıp havlusu içine girmekle, ben dahi mahalle-i mezbûrede üç dört âdem ahz için üzerine vardığımda işbu hançer ile sol meme[mi]n üstünden darb ve cerh etmişdir mezbûr diğer Yusuf’dan suâl olunup takrîri tahrîr ve mûcibi icrâ olunmak matlûbumdur dedikde gıbbe’s-suâl merkūm diğer Yusuf cevâbında merkūme Nevcivan’ın câriyesi olup gāib ani’l-meclis olan Belkıs dâimâ beni mersûme Nevcivan’ın menziline da‘vet etmek ile ben dahi câriye-i mersûme için bir kaç def‘a gece ile varmışidim işbu gün dahi câriye-i merkūme Belkıs beni da‘vet etmek ile ben dahi işbu gece vakt-i mezkûrda mezbûre Nevcivan’ın menzilinin havlusu içine girdiğimde müdde‘î-i mezbûr Yusuf üç dört âdem ile beni karşılayıp üzerime ahz için hücûm ettiklerinde ben dahi müdde‘î-i mezbûr Yusuf’un sol memesi üstünde işbu hançer ile ber vech-i muharrer darb ve cerh eyledim deyû tâyi‘an ikrâr ve i‘tirâf etmeğin mâ vaka‘a kayd şüd. Fi’l-yevmi’l-hâmis ve’l-ışrîn min Zilka‘deti’ş-şerîfe sene [10]90.
Şuhûdü’l-hâl: Nasuh Halîfe b. Abdüsselâm el-Müezzin, İbrahim Ağa b. Halil, Receb Beşe b. Mustafa, Sefer Beşe b. Mustafa, Musli Ağa b. Hasan, İbrahim Ağa b. Mehmed Kethüdâ, Ahmed b. Hüseyin, Mehmed Çelebi b. Mahmud, Mustafa b. Mahmud, Mustafa b. Mehmed, Mehmed b. Ahmed sarrâc, Mehmed Beşe b. Yusuf.
|