|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 251 Hüküm no: 252 Orijinal metin no: [37a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Emine bt. Cafer’in evini Halil Beşe b. Fazlullah’a satması
Medîne-i Hazret-i Ebâ Eyyûb-i Ensârî’de Takyecibaşı mahallesi sâkinelerinden Emine bt. Cafer nâm hâtun meclis-i şer‘-i şerîfde işbu râfi‘ü’l-kitâb Halil Beşe b. Fazlullah mahzarında bi tav‘ihâ ikrâr ve takrîr-i kelâm edip akd-i âti’z-zikrin silk-i mülkümde münselik olup mahalle-i mezbûrede vâki‘ bir tarafdan İbrahim b. Ramazan mülkü ve bir tarafdan Meryem bt. Abdullah mülkü ve bir tarafdan Havva Hâtun bt. Hüseyin mülkü ve bir tarafdan tarîk-i âm ile mahdûd iki tahtânî ve bir fevkānî odaları ve havluyu müştemil menzilimi cemî‘ tevâbi‘iyle mezbûr Halil Beşe’ye yüz kıt‘a esedî guruşa tarafından îcâb ve kabûlü hâvî bey‘-i bâtt-ı sahîh ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mastûr yüz guruşu mezbûr Halil Beşe yedinden tamâmen ahz ve kabz eyledim ba‘de’l-yevm menzil-i mahdûd-ı mezkûr merkūm Halil Beşe’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: İbrahim Efendi b. Hasan, Receb Efendi el-İmâm, Mehmed Çelebi el-Müezzin, Ahmed Çelebi b. Ali, Ramazan b. İvaz, Mehmed b. Abdünnebi, Mehmed b. Ali, Mustafa b. Mehmed, Ahmed Çelebi b. Emrullah ve gayruhüm.
|