.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 252
Hüküm no: 254
Orijinal metin no: [37b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Emine bt. Hasan Ağa’nın, eve ait hissesini Hasan Çelebi b. İbrahim’e satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bâ[rî]- mahallâtından Ahmed Dede mahallesi sükkânından iken bundan akdem fevt olan Tavukçubaşı demekle ma‘rûf Hasan Ağa nâm müteveffânın verâseti sulbiye kebîre kızları Fâtıma ve İsmihân ve Emine ile sulbî kebîr oğlu Ali’ye münhasıra olup ba‘dehû kable’l-kısmet mezbûr Ali dahi vefât edip verâseti li eb kız karındaşları merkūmât Fâtıma ve İsmihân ve Emine ile ibn-i ammi Abdurrahman’a münhasıra olup ba‘dehû kable’l-kısmet merkūme Fâtıma dahi fevt olup verâseti li ebeveyn kız karındaşı merkūme İsmihân ve li eb kız karındaşı mezbûre Emine ile ibn-i ammi mezbûr Abdurrahman’a münhasıra ve tashîh-i mes’eleleri iki yüz yetmiş sehimden i‘tibâr olunup sihâm-ı mezkûreden yüz on yedi sehmi merkūme İsmihân’a ve doksan bir sehmi mezbûre Emine’ye ve altmış iki sehmi mezbûr Abdurrahman’a isâbet ve intikāl eylediği lede’ş-şer‘i’l-mutahhar zâhir ve mütehakkik oldukdan sonra merkūm Emine meclis-i şer‘-i hatîr-i lâzımü’t-tevkīrde li eb kız karındaşı oğlu işbu râfi‘ü’l-kitâb Hasan Çelebi b. İbrahim nâm kimesne mahzarında bi tav‘ihâ ikrâr ve takrîr-i kelâm edip mahalle-i mezbûrede vâki‘ bir tarafdan merhûm Sâlih Paşa çiftliği demekle ma‘rûf çiftliğin arâzisi ve bir tarafdan el-Hâc Şaban bağı ve odaları ve iki tarafdan tarîk-i hâs ile mahdûd bir fevkānî oda ve bir sofa ve zât-ı eşcâr-ı müsmire ve gayr-ı müsmire bahçeyi ve bir harâbe bağı müştemil mülk menzilde olan doksan bir sehim hisse-i mezkûremi mezbûr Hasan Çelebi’ye üç bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr üç bin akçeyi mezbûr Hasan Çelebi yedinden tamâmen ahz ve kabz eyledim ba‘de’l-yevm zikr olunan doksan bir sehim hissem merkūm Hasan Çelebi’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a kayd şüd. Fî gurreti Zilhicceti’ş-şerîfe li sene tis‘în ve elf.


Şuhûdü’l-hâl: Abdullah Efendi b. Mehmed el-İmâm, Ebûbekir Ağa b. ( ), Abdullah Halîfe b. Veli el-Müezzin, Ahmed Ağa b. ( ), İsmail Çelebi b. ( ), es-Seyyid Ârif Çelebi b. Mustafa ve gayruhüm.