|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 253 Hüküm no: 255 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali b. Hasan’ın mirasçılarından Abdurrahman’ın hakkını alması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Ahmed Dede mahallesi sâkinlerinden iken bundan akdem fevt olan Ali b. Hasan’ın verâseti li ebeveyn kız karındaşlar Emine ve İsmihân ve Fâtıma’ya ve li ebeveyn ammisi oğlu Abdurrahman’a münhasıra olduğu şer‘an zâhir ve mütehakkik oldukdan sonra mezbûr Abdurrahman meclis-i şer‘-i şerîfde bundan esbak vefât eden merkūme İsmihân’ın sadrî kebîr oğlu ve terekesine vâzı‘ü’l-yed olan işbu râfi‘ü’l-kitâb Hasan Çelebi b. İbrahim nâm kimesne mahzarında tav‘an ikrâr-ı tâm ve takrîr-i kelâm edip ammim müteveffâ-yı mezbûrun terekesinden bana isâbet eden sülüs hisse-i şer‘iyyemi müteveffât-ı merkūme İsmihân hâl-i hayâtında ahz ve kabz edip kable’t-teslîm fevt olmağla üzerinde kalmışidi hâlâ tereke-i müteveffât-ı merkūmeye vâzı‘ü’l-yed olan mezbûr Hasan Çelebi’den bana âid sülüs hisse-i mezkûremi taleb ve da‘vâ eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuşdu el-hâletü hâzihî beynimizde muslihûn-ı müslimûn tavassut edip mezbûr Hasan Çelebi ile beni beş esedî guruş üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı merkūmu mezbûr Hasan Çelebi yedinden tamâmen ahz ve kabz edip ammim müteveffâ-yı mezbûrun terekesinden sülüs hisse-i mezbûreme müte‘allika âmme-i de‘âvî ve mütâlebâtdan zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâmin ve’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: es-Sâbikūn.
|