|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 254 Hüküm no: 256 Orijinal metin no: [37b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yahudi Şeban v. Hayder’in, Mehmed b. Yolcu’ya borcunu ödemesi gerektiği
Mahmiye-i İstanbul’da Vezir hanında sâkin tüccâr tâifesinden işbu râfi‘[ü’l-kitâb] Mehmed b. Yolcu? nâm kimesne mahfil-i kazâda Havâss-ı Aliyye müzâfâtından kasaba-i Hasköy’de Kiremitçi Ahmed Çelebi mahallesinde sâkin Şeban v. Hayder nâm Yahudi muvâcehesinde üzerine da‘vâ ve takrîr-i kelâm edip mezbûr Şeban zimmetinde vasfı ve cinsi beynimizde ma‘lûm emti‘a-i mütenevvi‘a semeninden on iki buçuk esedî guruş hakkım olup hattâ meblağ-ı mezkûr bana deyni olduğunu huzûr-ı müslimînde bundan akdem ikrâr dahi etmişiken, hâlâ taleb eylediğimde vermede te‘allül eder suâl olunup edâsına tenbîh olunmak matlûbumdur dedikde gıbbe’s-suâl ve akībe’l-inkâr ve isre talebi’l-beyyine udûl-i ricâlden olup sâlifü’z-zikr handa sâkin Hüseyin b. Hasan nâm kimesne ile Artin v. Moses nâm zimmî mahfil-i kazâya li ecli’ş-şehâde hâzırân olup istişhâd [38a] olunduklarında fi’l-hakīka mersûm Şeban ber vech-i muharrer müdde‘î-i mezbûr Mehmed’e meblağ-ı mezkûr on iki buçuk esedî guruş zimmetinde lâzımü’l-edâ deyni olduğunu bizim huzûrumuzda ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle meblağ-ı merkūmu müdde‘î-i mezbûr Mehmed’e edâya mesfûr Şeban’a tenbîh birle mâ vaka‘a kayd şüd. Fi’l-yevmi’s-sâmin ve’l-ışrîn min Zilka‘deti’ş-şerîfe li sene tis‘în ve elf.
Şuhûdü’l-hâl: Mehmed b. Eyüb, Mehmed b. Mahmud, Hasan b. Abdullah, Ali b. Abdullah.
|