.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 255
Hüküm no: 258
Orijinal metin no: [38a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ali Çelebi b. Seydi’nin evini, Emine bt. Abdullah ile Mehmed Bey b. Abdullah’a satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sükkânından Ali Çelebi b. Seydî nâm kimesne meclis-i şer‘-i şerîf-i enverde işbu râfi‘atü’l-kitâb tasdîk-i âti’z-zikre kendi tarafından asîl ve zevcesi Emine bt. Abdullah nâm hâtun tarafından sâbitü’l-vekâle vekîl olan Mehmed Bey b. Abdullah nâm kimesne mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Hâmide bt. Mustafa nâm hâtun mülkü iki bâb ve bir tarafdan Fağfûr bt. Abdullah nâm hâtun mülkü ve bir tarafdan tarîk-i âm ile mahdûd iki bâb ve ocaklı ve iki bâb ocaksız dört fevkānî ve iki bâb tahtânî odaları ve iki sofa ve bi’r-i mâ ve kenîf ve zât-ı eşcâr-ı müsmire bahçeyi müştemil menzilimin sülüsânı mezbûr Mehmed Bey’e yüz altmış altı kıt‘a esedî guruş ile bir sülüs guruşa ve sülesânı dahi seksen üç esedî guruş ile bir zolataya müvekkile-i mezbûre Emine’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi minvâl-i muharrer üzre iştirâ ve tesellüm ve kabûl eylediklerinde sonra semeni olan meblağayn-ı mezkûreyn ki cem‘an üç yüz elli guruşu mezbûrân Mehmed Bey ve Emine yedlerinden tamâmen ahz ve kabz eyledim ba‘de’l-yevm menzil-i mahdûd-ı mezkûr vech-i meşrûh üzre mezbûrânın ber vech-i iştirâk mülk-i müşterâları olmuşdur keyfe mâ yeşâ’ân mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’l-ibtigā kayd şüd. Fî gurreti Zilhicceti’ş-şerîfe li sene tis‘în ve elf.


Şuhûdü’l-hâl: Receb Efendi el-İmâm, Mehmed Çelebi b. ( ) el-Müezzin, Mehmed Beşe b. İbrahim, Ahmed Çelebi b. Ali, İbrahim Bey b. Mehmed, Hüseyin Çelebi b. Halil, Hasan Bey Bölükbaşı, Kethüdâ-yı Teberdârân Nasuh Bey.