.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 256
Hüküm no: 260
Orijinal metin no: [38a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Polihroni v. Şiro’nun, bostan yerini Yani v. Panayot’a satması

Vilâyet-i Rumeli’nde medîne-i Yenişehir müzâfâtından Kûhistan nâhiyesine tâbi‘ Palyokasrı nâm karye ahâlîsinden Polihroni v. Şiro nâm zimmî meclis-i şer‘-i şerîfde işbu râfi‘ü’r-rakīm Yani v. Panayot nâm zimmî muvâcehesinde tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezbûrede vâki‘ bir tarafdan Minhopodi mülkü ve bir tarafdan tarîk-i âm ile mahdûd bir fevkānî oda ve altında ahır ve bir dip dut ve bir asma eşcârı ve bir anbarı müştemil mülk menzilimi cemî‘ tevâbi‘ ve levâhıkıyla ve yine karye-i mezbûrede vâki‘ bir tarafı Yorgi Şiro mülkü ve bir tarafı Kosta Şiro mülkü ve bir tarafı Yorgi Dorani mülkü ve bir tarafı tarîk-i âm ile mahdûd zât-ı eşcâr-ı müsmire ve gayr-ı müsmireyi hâvî mülk bostan yerini, cemî‘ hukūk ve merâfıkı ile merkūm Yani’ye bi safkatin vâhidetin dört bin sekiz yüz fıddî râyic fi’l-vakt akçe tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl edip semeni olan meblağ-ı mezkûr dört bin sekiz yüz akçeyi mersûm Yani yedinden tamâmen ahz ve kabz eylediğimden sonra zikr olunan menzil ve bostan yerini mahallinde zabt ve tasarrufa merkūm Yani’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Zilhicceti’ş-şerîfe li sene tis‘în ve elf.


Şuhûdü’l-hâl: Hasan b. Abdullah, Ali b. Abdullah, Mehmed b. Mahmud ve gayruhüm.