|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 257 Hüküm no: 261 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Lanbo v. Yamandi’nin bağını Sefer Beşe b. Bayram’a satması
Havâss-ı Aliyye kazâsına tâbi‘ Küçükçekmece nâhiyesine tâbi‘ Anbarlı nâm karyede sâkin Lanbo v. Yamandi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Sefer Beşe b. Bayram nâm kimesne mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan Ali Ağa tarlası ve bir tarafdan Pandazi tarlası ve bir tarafdan Yani tarlası ve bir tarafdan Şeyhzâde tarlası ile mahdûd tahmînen bir dönüm bağı, cemî‘ hukūk ve merâfıkı ile merkūm sefer Beşe’ye dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûru mezbûr Sefer Beşe yedinden tamâmen ahz ve kabz eyledim ba‘de’l-yevm sâlifü’z-zikr bağ mezbûr Sefer Beşe’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ cerâ bi’l-ibtigā kayd şüd. Fi’l-yevmi’s-sâlis aşer min Zilhicceti’ş-şerîfe sene 1090.
Şuhûdü’l-hâl: Mehmed Çelebi b. ( ), Hasan Çelebi b. ( ), Ahmed Beşe b. ( ), Ali Beşe b. ( ).
|