.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 258
Hüküm no: 263
Orijinal metin no: [38b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan b. İbrahim’in borcunu Murad b. Abdullah’ın vârislerine ödemesi

Medîne-i Hazret-i Ebâ Eyyûb-i Ensârî mahallâtından Süleyman Subaşı mahallesi sükkânından iken bundan akdem fevt olan Murad b. Abdullah’ın verâseti zevce-i metrûkesi Gülistan bt. Abdullah ile sulbiye kebîre kızları Fâtıma ve Âişe’ye münhasıra olup tashîh-i mes’eleleri on altı sehimden i‘tibâr olunup sihâm-ı mezkûreden iki sehmi merkūme Gülistan’a ve yedişer sehmi mezbûretân Fâtıma ve Âişe’ye isâbet ve intikāl eylediği şer‘an zâhir ve mütehakkik oldukdan sonra işbu râfi‘atü’l-kitâb merkūme Fâtıma mahfil-i kazâda Hasan b. İbrahim nâm kimesne mahzarında üzerine da‘vâ ve takrîr-i kelâm edip mûrisimiz babam müteveffâ-yı mezbûrun merkūm Hasan zimmetinde otuz esedî guruş hakkı olup kable’l-ahz fevt olmağla meblağ-ı mezkûr mezbûr Hasan zimmetinde kalmışdı hâlâ meblağ-ı mezkûrdan benim hisse-i irsiyyeme isâbet eden on üç esedî guruş ile on beş akçe hakkımı taleb ederim suâl olunup edâsına tenbîh olunmak matlûbumdur dedikde gıbbe’s-suâl merkūm Hasan cevâbında müteveffâ-yı mezbûre meblağ-ı mezkûr otuz guruş zimmetinde lâzımü’l-edâ deyni olduğunu tav‘an ikrâr etmeğin alâ mûcebi ikrârihî müdde‘iyye-i mezbûre Fâtıma’nın hissesine isâbet eden meblağ-ı merkūmu edâya mezbûr Hasan’a tenbîh birle mâ vaka‘a kayd şüd. Fi’l-yevmi’l-hâmis aşer min Zilhicceti’ş-şerîfe li sene tis‘în ve elf.


Şuhûdü’l-hâl: Ali b. Abdullah, Hasan b. Abdullah, Mehmed b. Mahmud ve gayruhüm.