.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 258
Hüküm no: 264
Orijinal metin no: [38b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Benyamin v. Mosi’nin vakf ettiği eve ait birikmiş kirayı İlya v. Menahim’in ödemesi

Havâss-ı Aliyye kazâsına tâbi‘ kasaba-i Hasköy’de Keçeci Pîrî mahallesinde vâki‘ bir tarafı Karaî kilisesi ve bir tarafı Salamon Azamir nâm Yahudi mülkü ve bir tarafı tarîk-i âm ile mahdûd Benyamin v. Mosi nâm Yahudi’nin vakfı olan menzilin berât-ı âlîşân ile bi’l-fi‘l mütevellîsi olan işbu râfi‘ü’l-kitâb Mehmed Çavuş b. Abdullah nâm mühtedî mahfil-i kazâda Orta cemâ‘atinden olup yirmi sekiz akçe ücret-i müeccele ile menzil-i mezkûrda sâkin olan İlya v. Menahim nâm Yahudi muvâcehesinde bi’t-tevliyye üzerine da‘vâ ve takrîr-i kelâm edip merkūm İlya zimmetinde menzil-i mezkûr ücretinden yevmî ikişer akçeden yirmi altı ayda bâkī bin beş yüz altmış akçe kalmağla hâlâ taleb eylediğimde vermede ta‘allül eder suâl olunup edâsına tenbîh olunmak matlûbumdur dedikde gıbbe’s-suâl merkūm İlya cevâbında menzil-i mahdûd-ı mezkûr ücretinden ber vech-i muharrer yirmi altı ayda meblağ-ı mezbûr bin beş yüz altmış akçe bâkī zimmetinde kaldığını tav‘an ikrâr etmeğin alâ mûcebi ikrârihî meblağ-ı mezbûru mütevellî-i merkūma edâya mesfûr İlya’ya tenbîh olundukdan sonra mütevellî-i mezbûr Mehmed Çavuş mesfûr İlya muvâcehesinde takrîr-i kelâm edip meblağ-ı mezkûru merkūm İlya yedinden tamâmen ahz ve kabz eyledim dedikde mâ cerâ bi’t-taleb kayd şüd. Fi’l-yevmi’l-hâdî aşer min Zilhicceti’ş-şerîfe li sene tis‘în ve elf.


Şuhûdü’l-hâl: Ahmed Çelebi b. Mustafa, İbrahim Efendi b. Mustafa, Hasan b. Abdullah, Ali b. Abdullah ve gayruhüm.