|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 259 Hüküm no: 266 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mihal v. Paskal’ın evini istiğlâl yoluylamütevelli Mustafa b. Ahmed’e satması
Havâss-ı Aliyye müzâfâtından Nifos nâm karye ahâlîsinden Mihal v. Paskal nâm zimmî meclis-i şer‘-i şerîf-i enverde hadîka-i Davudpaşa gılmânı mühimmâtına mevkūfe nukūda bi’l-fi‘l mütevellî olan hadîka-i merkūmede harem bekçisi olan işbu râfi‘ü’l-kitâb el-Hâc Mustafa b. Ahmed nâm bostânî mahzarında tav‘an ikrâr-ı tâm ve takrîr-i kelâm edip silk-i mülkümde münselik emlâkimden olup karye-i mezkûrede vâki‘ bir tarafdan Âişe Hanım mülkü ve bir tarafdan Riz mülkü ve bir tarafdan Kosta mülkü ve bir tarafdan tarîk-i âm ile mahdûd menzilimi cemî‘ tevâbi‘ ve levâhıkıyla mütevellî-i mezbûr el-Hâc Mustafa’ya elli iki kıt‘a esedî guruşa bi tarîki’l-istiğlâl bey‘ ve teslîm edip ol dahi tarîk-i mezkûr üzre vakf-ı mezbûr malıyla iştirâ ve tesellüm ve kabûl eyleyip semeni olan meblağ-ı merkūm elli iki guruşu mütevellî-i mezbûr el-Hâc Mustafa yedinden tamâmen ahz ve kabz eylediğimden sonra yine mütevellî-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin dokuz yüz otuz altı akçe icâre ile bana îcâr ve teslîm ben dahi minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâmis aşer min Zilhicceti’ş-şerîfe li sene tis‘în ve elf.
Şuhûdü’l-hâl: Mustafa Efendi b. Mehmed el-Hatîb, Mustafa Efendi b. Fazlullah, Mustafa Bey b. Halil, Osman Bey b. Abdullah, İbrahim b. Muharrem el-Bostânî, Hasan b. Abdullah, Mehmed b. Mahmud ve gayruhüm.
|