.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 263
Hüküm no: 273
Orijinal metin no: [40a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed b. Ahmed’in evini Fâtıma bt. Ahmed’e satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Evlice Baba mahallesi sükkânından Mehmed b. Ahmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Fâtıma bt. Ahmed nâm hâtunun zevci ve tarafından husûs-ı âti’l-beyâna vekîli olup hasm-ı câhid-i şer‘î muvâcehesinde mezbûrenin zâtını ma‘rifet-i şer‘iyye ile ârifân olan Musli Çelebi b. Osman ve İbrahim b. Hüseyin nâm kimesneler şehâdetleriyle şer‘an vekâleti sâbite olan Mehmed Efendi b. Ahmed mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Âişe hâtun mülkü ve bir tarafdan Şaban Beşe tasarrufunda olan vakıf menzil ve bir tarafdan Mustafa b. Osman mülkü ve bir tarafdan tarîk-i âm ile mahdûd bir fevkānî ve iki tahtânî odaları ve mezbûr Şaban Beşe ile müşterek bi’r-i mâyı müştemil menzilimi cemî‘ tevâbi‘ ve levâhıkı müvekkile-i merkūme Fâtıma Hâtun’a sekiz bin dört yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve teslîm ve kabûl eyledikden sonra semeni olan meblağ-ı mezbûr sekiz bin dört yüz akçeyi müvekkile-i mezbûre yedinden tamâmen ahz ve kabz eyledim ba‘de’l-yevm menzil-i mahdûd-ı mezkûr müvekkile-i merkūmenin mülk-i müşterâsı olmuşdur keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-ışrîn min Zilhicceti’ş-şerîfe li sene tis‘în ve elf.


Şuhûdü’l-hâl: Abdi Beşe b. Mehmed, Osman Çelebi b. Mehmed Usta, İbrahim Çelebi b. Mustafa, Abdullah Halîfe b. Abdullah el-Müezzin, Mustafa Çelebi b. Mehmed, Ahmed Çelebi b. Mehmed, Hasan b. Abdullah.