.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 266
Hüküm no: 278
Orijinal metin no: [40b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice Hatun bt. Yusuf’un, evini Restaki v. Papatatos ve Asvador v. Melkon’a satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı Paşa mahallesi sâkinelerinden fahrü’l-muhadderât Hatice Hâtun bt. Yusuf tarafından husûs-ı âti’l-beyâna vekîl olup hasm-ı câhid-i şer‘î mahzarında mezbûrenin zâtını ma‘rifet-i şer‘iyye [ile] ârifân olan Derviş Ali Çelebi b. Yakub ve Mehmed Çelebi b. Veli şehâdetleriyle şer‘an vekâleti sâbite olan Mustafa Çelebi b. Cafer nâm kimesne meclis-i şer‘-i hatîr-i lâzımü’t-tevkīrde işbu râfi‘ü’r-rakīm Restaki v. Papatatos ve Asvador v. Melkon nâm Ermeniler muvâcehelerinde bi’l-vekâle ikrâr-ı tâm ve takrîr-i kelâm edip müvekkilem merkūme Hatice Hâtun akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ iki tarafdan Safiye Hâtun mülkü ve bir tarafdan yine mezbûre Safiye Hâtun’un dolap kuyusu ve bir tarafdan tarîk-i âm ile mahdûd hâriciyyesi üç bâb fevkānî odaları müştemil arsasının senede yüz sekiz akçe mezkûr Nişancı Paşa vakfı’na mukāta‘ası olan menzilini cemî‘ tevâbi‘ ve levâhıkı ile mezbûrân Restaki ve Asvador’a ale’l-iştirâki’s-seviy iki yüz doksan esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr iki yüz doksan guruş merkūmân Ermeniler yedlerinden tamâmen ahz ve kabz eyledim ba‘de’l-yevm menzil-i mahdûd-ı mezkûr mezbûrânın mülk-i müşterâlarıdır keyfe mâ yeşâ’ân mutasarrıflar olsunlar dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’l-hâmis ve’l-ışrîn min Zilhicceti’ş-şerîfe li sene tis‘în ve elf.


Şuhûdü’l-hâl: Abdullah Efendi b. Ahmed Efendi, Hüseyin Halîfe b. Mehmed el-Müezzin, Mehmed Efendi b. ( ) el-İmâm, Ramazan Çelebi b. Mustafa, Benderli Mehmed, Kuloğlu Ahmed, Berber Ali b. Mehmed.