|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 267 Hüküm no: 280 Orijinal metin no: [40b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Restaki ve Asvador adlı Ermeniler’in aldıkları borca karşılık istiğlâl yoluyla evlerini Hadım Ali Ağa Vakfı’na satması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı Paşa mahallesi ahâlîsinden Restaki v. Papatatos ve Asvador v. Melkon nâm Ermeniler meclis-i şer‘-i hatîrde medîne-i mezbûrede vâki‘ merhûm Hâdim Ali Ağa vakfı’na berât-ı âlîşân ile bi’l-fi‘l mütevellî olan işbu râfi‘ü’l-kitâb Mustafa Çelebi b. Mehmed mahzarında her biri ikrâr-ı tâm ve takrîr-i kelâm edip ale’l-iştirâki’s-seviy silk-i mülkümüzde münselik olup mahalle-i mezbûrede vâki‘ bir tarafı Safiye Hâtun’un dolab kuyusu ve iki tarafı yine mezbûr Safiye Hâtun mülkü ve bir tarafı tarîk-i âm ile mahdûd menzilimizi cemî‘ tevâbi‘ ve levâhıkı ile mütevellî-i mezbûr Mustafa Çelebi’ye yüz doksan kıt‘a esedî guruşa bi tarîki’l-istiğlâl bey‘ ve teslîm edip ol dahi vakf-ı mezkûr malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı merkūm yüz doksan guruşu mütevellî-i mezbûr yedinden tamâmen ahz ve kabz eylediğimizden sonra yine mütevellî-i mezbûra menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î sene-i âtiye Muharremü’l-harâmı gurresinden her senesi on dokuz esedî guruş ücret ile üç sene tamâmına değin cem‘an elli yedi guruşa bize îcâr ve teslîm edip biz dahi minvâl-i muharrer üzre istîcâr ve tesellüm ve kabûl eyledik ve her birimiz âharın zimmetine lâzım gelen meblağa emr ve kabûlü hâviye kefâlet-i sahîha-i şer‘iyye ile kefîl ve zâmin olduk dediklerinde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sâbi‘ ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Mehmed Çelebi b. Veli, Mehmed Çelebi b. Mustafa, Süleyman Çelebi b. Davud, İbrahim Halîfe b. Hasan, Hüseyin Halîfe b. Mehmed el-Müezzin, Mustafa b. Cafer ve gayruhüm.
|