|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 268 Hüküm no: 281 Orijinal metin no: [40b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mühtedi Mehmed’in, babası Abraham v. Sabatay’ın terekesinden hakkını alması
Havâss-ı Aliyye kazâna tâbi‘ kasaba-i Hasköy’de Keçeci Pîrî mahallesi ahâlîsinden iken bundan akdem mürd olan Abraham v. Sebetay nâm hâlikin verâseti zevce-i metrûkesi Roşe bt. İlya ile sulbî kebîr oğlu olup helâkinden sonra şeref-i İslâm ile müşerref olan Mehmed nâm mühtedî ile âhar oğulları Sebetay ve İlya ve Rofail nâm Yahudilere münhasıra oldukdan sonra mezbûr Mehmed meclis-i şer‘-i şerîfde merkūme Roşe tarafından tasdîk-i âti’z-zikre vekîl-i sâbitü’l-vekâle olan Yako v. İlya nâm Yahudi ile mersûmûn Sebetay ve İlya ve Rofail muvâcehelerinde tav‘an ikrâr-ı tâm ve takrîr-i kelâm edip babam hâlik-i merkūm Abraham’ın nukūd ve urûz ve sâir kalîl ve kesîr ism-i mâl ıtlâk olunur terekesinden bana âid olan hisse-i şer‘iyye-i mu‘ayyenemi merkūmûn yedlerinden ahz ve kabz edip babam hâlik-i [41a] mezbûrun terekesinden benim hisse-i şer‘iyyeme müte‘allika âmme-i de‘âvî ve mütâlebât ve eymân ve muhâsamâtdan merkūmûnun zimmetlerini ibrâ-i âm ve kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sâmin ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Umdetü’l-kuzât Ahmed Efendi eş-şehîr bi Bâlizâde, Ali Efendi b. Mehmed el-İmâm, Hüseyin Bey b. Abdurrahman, Hasan b. Abdullah, Hüseyin Çelebi b. Ali, Mehmed b. Eyüb.
|