.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 269
Hüküm no: 283
Orijinal metin no: [41a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Londo v. İsteriko’nun bağını Kalado ve Apostol v. Zafko’ya satması

Vilâyet-i Rumeli’nde Görice kazâsına tâbi‘ Piskopiye nâm karyede Londo v. İsteriko nâm zimmî meclis-i şer‘-i hatîr-i lâzımü’t-tevkīrde işbu rafi‘i’r-rakīm Kalado ve Apostol v. Zafko nâm zimmîler muvâcehesinde tav‘an ikrâr-ı tâm ve takrîr-i kelâm edip silk-i mülkümde münselik olup kazâ-i mezbûr müzâfâtından Anborye? nâm karyede vâki‘ bir tarafı Hristo mülkü ve bir tarafı merkūm Kalado bağı ve bir tarafı Biko mülkü ve bir tarafı tarîk-i âm ile mahdûd tahmînen bir dönüm ve iki kalem ta‘bîr olunur bir kıt‘a mülk harâbe bağımı cemî‘ hukūk ve rüsûmu ile merkūmân Kalado ve Apostol’e ale’l-iştirâki’s-seviy dört yüz elli akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip anlar dahi ber vech-i muharrer iştirâ ve kabûl eyleyip semeni olan meblağ-ı mezkûru mezbûrân yedlerinden tamâmen ahz ve kabz eylediğimden sonra sâlifü’z-zikr bağı mahallinde zabt ve tasarrufa mezbûrânı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilhicceti’ş-şerîfe li sene tis‘în ve elf.


Şuhûdü’l-hâl: Hüseyin b. Ali, Ahmed b. Abdullah, Hasan b. Abdullah, Mehmed b. Mahmud ve gayruhüm.