.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 270
Hüküm no: 285
Orijinal metin no: [41a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin b. Abdullah’ın vârislerinin, evlerini Mehmed b. Abdullah’a satmaları

Havâss-ı Aliyye kazâsı nevâhîsinden Büyükçekmece nâhiyesine tâbi‘ Lahne nâm karyede sâkin iken bundan akdem fevt olan Hüseyin b. Abdullah’ın verâseti zevce-i metrûkesi Havva bt. Mehmed nâm hâtuna ve sulbiye kızları Âişe ve Sâliha nâm hâtunlar ile sulbî oğlu Mustafa’ya münhasır olduğu şer‘an zâhir ve mütehakkik oldukdan sonra mezbûrât Havva ve Âişe ve Sâliha ile sin ve cüssesinin bülûğa tahammülü olduğu hâlde bülûğuna mu‘terif olan mezbûr Mustafa meclis-i şer‘-i şerîfde işbu râfi‘ü’l-kitâb Mehmed b. Abdullah mahzarında her biri ikrâr-ı tâm ve takrîr-i kelâm edip ber vech-i iştirâk silk-i mülkümüzde münselik olup karye-i mezbûrede vâki‘ bir tarafı Veli mülkü ve bir tarafı Yusuf mülkü ve bir tarafı Ali Çelebi bostanı ve bir tarafı tarîk-i âm ile mahdûd iki bâb fevkānî oda ve bir ahır ve bi’r-i mâ ve kenîf ve bir mikdâr havluyu müştemil mülk-i mevrûsumuz olan menzili cemî‘ tevâbi‘iyle mezbûr Mehmed’e on beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve kabûl eyledikden sonra semeni olan meblağ-ı mezbûr on beş guruşu mezbûr Mehmed yedinden tamâmen ahz ve kabz edip bi’l-farîzati’ş-şer‘iyye beynimizde iktisâm eyledik ba‘de’l-yevm sâlifü’z-zikr menzil-i mezbûr Mehmed’in mülk-i müşterâsıdır keyfe mâ yeşâ’ ve yehtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi Zilhicceti’ş-şerîfe li sene tis‘în ve elf.


Şuhûdü’l-hâl: Yusuf b. Süleyman, Mehmed b. Ramazan, Ali b. Ahmed, Mehmed b. Eyüb, Mahmud b. Mehmed.