|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 271 Hüküm no: 287 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Müveşşemhan Hatun bt. Hacı Himmet’e ait eşyaları, kocası Hüseyin b. Mehmed’in geri vermesi
Fi’l-asl mahrûse-i Edirne’de Yeni İmâret mahallesi sâkinelerinden olup hâlâ mahmiye-i İstanbul’da Hüsrev Paşa türbesi kurbunda müsâfiren sâkine olan bâ‘isetü’l-kitâb Müveşşemhan Hâtun bt. el-Hâc Himmet mahfil-i kazâda medîne-i Hazret-i Ebâ Eyyûb-i Ensârî’de Baba Haydar mahallesinde sâkin zevci Hüseyin b. Mehmed nâm kimesne mahzarında üzerine da‘vâ ve takrîr-i kelâm edip zevcim mezbûr Hüseyin beher miskāli ikişer yüz ellişer akçe kıymetli yirmi sekiz miskāl bir çift altın bileziğimi iznim ile mahrûse-i mezbûrede Küçükpazar kurbunda sâkin Osman Bey nâm kimesneye kırk guruş deyni mukābelesinde rehin vaz‘ ettikden sonra târih-i kitâbdan elli gün mukaddem sâlifü’z-zikr Yeni İmâret mahallesinde vâki‘ mülk menzilimden ben yoğiken bir çift sagīr zümrüd küpe ve bir gömlek ve bir don ve bir beyaz kutnî müsta‘mel kaftan ve bir al sandal kaftan ve bir mücevher ön kuşak ve bir sırmalı makrama ve bir al çatağı ve bir örgü ve altı münakkaş makrama ve bir münakkaş yüz yasdığı yüzü ve bir münakkaş don ve üç münakkaş uçkur ve dört beyaz makrama ve bir havlu makrama ve bir sîm sagīr bıçak ve bir sîm hilâldân ve üç sîm tılsım mühür ve bir sîm sagīr halhal ve bir sîm masat? ve on sîm kopça ve beher miskāli yedişer guruş kıymetli yedi buçuk miskāl inci ve bin beş yüz akçe kıymetli bir dîbâ kaftan ve beher miskāli ikişer yüz kırkar akçe kıymetli on bir buçuk miskāl on iki altın düğme ve üç yüz hurda cedîd akçe ve yüz para ve on beş aded ikilik ve on beş aded beşlik ve bir şerîfî altınımı ahz ve kabz edip firâr etmişidi hâlâ eşyâ-i merkūmeden gömlek ve don ve beyaz kaftan ve al kaftan ve mücevher kuşak ve sırmalı makrama ve al çatağı ve örgü ve makramaları ve yüz yastığını ve münakkaş don ve üç uçkur ve dört beyaz makrama ve bir havlu makrama ve bir sîm sagīr bıçak ve bir sîm hilâldân ve üç sîm tılsım mühür ve bir sîm halhal ve bir sîm masat? ve on sîm kopçayı bana meclis-i şer‘de teslîm edip bâkī eşyâ-i mezkûreden beher miskāli ikişer yüz kırkar akçe kıymetli on bir buçuk miskāl on iki altın düğme ve beher miskāli yedişer guruş kıymetli yedi buçuk miskāl inci ve bin beş yüz akçe kıymetli bir dîbâ kaftan ve beş guruş kıymetli bir çift zümrüd küpe ve üç yüz hurda akçe ve yüz para ve on beş ikilik ile on beş beşlik ve altınımı bana teslîm etmeyip zimmetinde kalmışdı suâl olunup zikr olunan bileziği rehinden tahlîse ve bâkī eşyâmdan mevcûd olanları bana teslîme ve bey‘ ile istihlâk ettiğinin kıymetlerini edâya tenbîh olunmak matlûbumdur dedikde gıbbe’s-suâl mezbûr Hüseyin cevâbında zevcesi müdde‘iyye-i mezbûrenin zikr olunan bileziğini vech-i meşrûh üzre rehin vaz‘ edip ve eşyâ-i muharrere-i mezkûresini dahi minvâl-i muharrer üzre ahz ve kabz etmişimdir ve eşyâ-i muharrereden inci ancak dört miskāl olup beher miskālini üçer yüz akçeye ve altın düğme dokuz miskāl olup beher miskālini yüz onar akçeye ve dîbâ kaftanı dört guruşa bey‘ edip semenlerini ve zikr olunan hurda akçe ve ikilik ve beşlik ve altını kendi mesârifime sarf ile istihlâk eyleyip mâ‘adâsı hâlâ yedimde mevcûddur deyû tav‘an ikrâr lâkin eşyâ-i muharrere-i mezkûrenin mekādîr ve kıymetleri bâlâda bast olunduğu üzre olduğunu inkâr edicek müdde‘iyye-i mezbûreden sâlifü’l-beyân eşyânın mekādîr ve kıymet-i misillerini mübeyyine beyyine taleb olundukda ityân-ı beyyine için istimhâl etmeğin ba‘de’l-imhâl mezbûr Hüseyin’in ikrârı mertebesi olan üç bin altı yüz kırk beş akçe ile yedinde mevcûd olan eşyâsını müdde‘iyye-i merkūmeye edâ ve teslîm ve izniyle rehin vaz‘ ettiği bileziğini tahlîse mezbûr Hüseyin’e tenbîh birle mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Ali Çelebi b. İbrahim, Mehmed Çelebi b. Yusuf, Mehmed Çelebi b. Mustafa, Halil b. Yusuf, Ahmed b. Abdullah.
|