|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 273 Hüküm no: 288 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sâliha bt. Ahmed’in evini Ali Bey b. Ahmed Bey’e satması
Havâss-ı Aliyye kazâsına tâbi‘ kasaba-i Hasköy’de Sütlüce nâm mevzi‘de Mahmud Ağa mahallesi sâkinelerinden Sâliha bt. Ahmed nâm hâtunun dâmâdı tarafından husûs-ı âti’l-beyâna vekîl olup hasm-ı câhid-i şer‘î muvâcehesinde mezbûrenin zâtını ma‘rifet-i şer‘iyye ile ârifân olan Mehmed b. Mehmed ve Mustafa b. Mehmed şehâdetleriyle şer‘an vekâleti sâbite olan Ali Çelebi b. Mehmed meclis-i şer‘-i şerîf-i enverde işbu kitâb-ı sıhhat-nisâbın sâhibi mefharü’l-mehâdîmi’l-kirâm zübtedü’l-e‘âli’l-fihâm Ali Bey b. el-merhûm Ahmed Bey el-ma‘rûf İbrahim Hanzâde taraf-ı bâhirü’ş-şereflerinden tasdîk-i âti’z-zikre vekîl-i sâbitü’l-vekâleleri olan Abdullah Ağa b. Abdurrahman mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Sâliha Hâtun akd-i âti’z-zikrin sudûruna değin silk-i mülk-i sahîhinde münselik olup mahalle-i mezbûrede vâki‘ iki tarafı müvekkil-i mûmâ-ileyh Ali Bey mülkü ve bir tarafı Zeynelabidin Çelebi mülkü ve taraf-ı râbi‘i tarîk-i âm ile mahdûd bir bâb tahtânî oda ve kenîfi ve havluyu müştemil menzilini cemî‘ tevâbi‘ ve levâhıkı ile müvekkili müşârün-ileyh Ali Bey’e on iki bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr on iki bin akçeyi müvekkil-i mûmâ-ileyh Ali Bey yedinden tamâmen ahz ve kabz eyledim ba‘de’l-yevm menzil-i mezkûrda vechen mine’l-vücûh alâkam kalmadı müvekkil-i mûmâ-ileyh Ali Bey’in mülk-i müşterâsı olmuşdur keyfe mâ yeşâ’ ve haysü mâ yehtâr mutasarrıf olsun dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Mustafa Ağa b. Ahmed, Abdullah Efendi b. Ahmed, Halil Efendi b. Haydar, Mehmed Efendi b. Ahmed, Mehmed Çelebi b. Mustafa ve gayruhüm mine’l-huzzâr.
|