Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 358 Hüküm no: 409 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hatun b. Murtaza’nın evini ve içindekileri kocası Cafer Efendi b. Pîrî’ye hibe ettiğine dair vasiyeti Husûs-ı âti’l-beyânın mahallinde tahrîr[i] iltimâs olmağın savb-ı celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Sâliha Hâtun bt. Murtaza’nın Dârü’l-hilâfeti’l-aliyye Kostantıniyye el-mahmiyye’de dergâh-ı âlî -dâme merci‘an li’l-e‘âlî- yeniçerilerine mahsûs yeni odalar kurbunda İskender Paşa mahallesinde sâkine olduğu menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde mezbûre Sâliha Hâtun zâtını ma‘rifet-i şer‘iyye ile ârifân sâbıkan kethüdâ yeri olan fahrü’l-akrân ve’l-ekfâ Yazıcızâde Çorbacı Mehmed Ağa b. Mustafa ve mahalle-i mezbûre müezzini Hasan Efendi b. Burhaneddin nâm kimesneler ta‘rîfleriyle mu‘arrefe oldukdan sonra meclis-i ma‘kūd-ı mezbûrda zevci işbu bâ‘isü’l-kitâb Cafer Efendi b. Pîrî nâm kimesne mahzarında takrîr-i kelâm ve ta‘bîr ani’l-merâm edip bu dâr-ı bevâr mahall-i temekkün ve karâr olmayıp nâzil olana irtihâl mukarrer ve mukīm olan intikāle muztar olduğuna câzime ve külli nefsin zâ’ikatü’l-mevt mefhûm-ı şerîfine âlime olmağın âlem-i fenâ ve şuhûddan menzil-i bekā ve hulûda rıhlet eylemezden mukaddem hulûs-i niyet ve sefâ-yı taviyyet ile emlâkinden elli miskāl altından masnû‘ bir çift bilezik ve yüz seksen dirhem sîmden masnû‘ bir raht kuşağını sâir emlâkinden mümtâz kılıp müzâfen ilâ mâ ba‘de’l-mevt şöyle vasiyyet eyledim ki bi irâdeti’llâhi’l-meliki’l-celîl hazret-i Azrâil girîbân-ı hayâtımı çâk ve cism-i nâ-tuvânımın menzilgehin hâk edip sem‘-i rûh-ı revânım yâ eyyetühe’n-nefsü’l-mutma‘inne irci‘î ilâ Rabbike râdiyeten marziyye nidâsını gûş u dest-i sâkī-i ecelden câm-ı fenâ-encâmı nûş ettiğimde zikr olunan bilezik ve kuşak bey‘ olunup semenleri yevm-i fevtimden üçüncü ve yedinci ve kırkıncı günlerde ve sene tamâmında ve sâir eyyâm-ı mu‘tâde de cânım için tabh-ı ta‘âma sarf olunup müslimîne it‘âm oluna deyû vasiyyetimi tenfîze zevcim mezbûr Cafer Efendi’yi vasiyy-i muhtâr nasb ve ihtiyâr eyledim ol dahi vesâyet-i mezbûreyi kabûl ve merâsimini edâya ta‘ahhüd eyledi ve zevcim mezbûr Cafer Efendi’den gayrı vârisim olmamağla mahalle-i mezbûrede vâki‘ zevcim mezbûr Cafer Efendi ile sâkin olduğumuz bir tarafdan Bıçakçı İbrahim Paşa sarayı ve bir tarafdan vezîriâzam merhûm Kara Mustafa Paşazâde beylik sarayı ve bir tarafdan mûmâ-ileyh Yazıcızâde Çorbacı Mehmed Ağa menzili ve bir tarafdan tarîk-i âm ile mahdûd işbu menzilin binâsı mülküm olmağın menzil-i mahdûd-ı mezkûrun binâsının ve sâir içinde mevcûde olan kalîl ü kesîr ve celîl ü hakīr eşyâmın nısfını zevcim mezbûr Cafer Efendi bi tarîki’l-vasiyyeti’ş-şer‘iyye ahz u kabz eyledikden sonra nısf-ı âharını dahi bi tarîki’l-vasiyye ahz u kabz eyleye deyû vasiyyet eyledim dedikde merkūm Cafer Efendi dahi vasiyyet-i mezbûreyi kabûl eylemeğin husûs-ı mezbûru mevlânâ-yı mezbûr mahallinde kayd ma‘an irsâl olunan Hasan Çelebi b. İbrahim ile meclis-i şer‘-i hatîre gelip alâ vukū‘ihî inhâ ve takrîr ettikde mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâmin min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Ali, İbrahim Çelebi b. Mahmud, Sarrâc Mustafa Beşe b. Süleyman, Mehmed Çelebi b. İbrahim, Mahmud Çavuş b. Mustafa, Hüseyin Çelebi b. Hamza ve gayruhüm.