Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 359 Hüküm no: 410 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Hüseyin’in, Hekim Ahmed Ağa b. Abdullah’ın izinsiz odasına girip çaldığı eşyalarını geri vermesi Mahmiye-i İstanbul’da Koca Mustafa Paşa kurbunda Canbâziye mahallesinde işbu bâ‘isü’l-kitâb Hekim Ahmed Ağa b. Abdullah dîvân-ı hazret-i kāimmakāmîde meclis-i şer‘-i hatîrde mukaddemâ hizmetkârı olan Ali b. Hüseyin mahzarında üzerine takrîr-i da‘vâ edip işbu bin yetmiş altı şehr-i Ramazânü’l-mübâreki’nin yirmi yedinci günü işbu hizmetkârım Ali hizmetimde olduğu hâlde sâkin olduğum menzilimin mâbeyn odasına bilâ-izn girip bin beş yüz esedî guruş kıymetli bir bâftesi yâkutlu murassa‘ ve bir bâftesi elmas ile murassa‘ on iki bâfteli bir altın kemer kuşağımı ve samur sırtı kaplı bir kırmızı Londrine çuka şuşumu? ve kakum kaplı kâtibî yenli bir mor Londrine merdâne ferâceyi ve bir çift ortası yâkutlu yüz altmış beş kırat yeni ma‘den zümrüd küpemi ahz ve firâr eylemişdir hattâ işbu Ali mu’âheze olundukda eşyâ-i mezkûreyi zikr olunan mâbeyn odamdan ahzını ikrâr dahi eylemişdir, suâl olunup ahz eylediği eşyânın aynıları kā’ime ise aynılarının bana red ve teslîm olunmasın, istihlâk eyledi ise yevm-i ahzda kıymetlerinin alıvermesin taleb ederim dedikde gıbbe’s-suâl mezkûr Ali cevâbında ben zikr olunan eşyâyı ahz eyledim lâkin mezkûr bana dört yüz değnek urmağla ben dahi değnek darbından da‘vâ eylediği kuşağı ve küpeyi aldım deyû mükrehen ikrâr eyledim deyû cevâb vericek, gıbbe’l-istintâk müdde‘î-i mezkûr Hekim Ahmed Ağa mezkûr Ali’ye değnek urduğunu ve ikrâh-ı mezkûr ile ikrâr-ı meşrûhunu inkâr edicek mezkûr Ali’den da‘vâ-yı ikrâhı mübeyyine beyyine taleb olundukda beyyinem yokdur deyip mezkûr Hekim Ahmed Ağa’ya yemîn teklîf eylememekle ikrârı olan mücevher kuşağın ve küpenin kıymetlerinin zamânı ile mezkûr Ali üzerine iltizâm olunup mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene sitte ve seb‘în ve elf. Şuhûdü’l-hâl: Süleyman Ağa b. Ahmed el-Hammâmî, Mustafa Bey b. Hasan Mi‘mâr-ı bahçe, Mahmud Çavuş b. Hamza, Abdi Ağa b. Mehmed ve gayruhüm Nukilet mine’s-sicilli’l-mahfûz fi’l-yevmi’s-sânî aşer min Recebi’l-mürecceb li sene seb‘a ve seb‘în ve elf.