.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 273
Hüküm no: 289
Orijinal metin no: [41b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Mahmud’un boşandığı kocası tarafından darp edildiği iddiasının reddi

Mahmiye-i İstanbul’da Camcı çeşmesi kurbunda sâkine Fâtıma bt. Mahmud nâm hâtun mahfil-i kazâda zevc-i muhâli‘i işbu râfi‘ü’l-kitâb Ahmed b. Mustafa nâm kimesne mahzarında üzerine da‘vâ ve takrîr-i kelâm edip mezbûr Ahmed zevcim olup beynimizde hüsn-i mu‘âşeretimiz olmamağla bundan akdem mehrinden fâriğa ol seninle muhâla‘a olayım deyû beni darb etmekle ben dahi zimmetinde mütekarrir olan bin beş yüz akçe mehr-i müeccel hakkımdan fâriğa olmuşidim hâlâ taleb ederim suâl olunup alıverilmek matlûbumdur dedikde gıbbe’s-suâl mezbûr Ahmed cevâbında hul‘-ı mezkûru ikrâr lâkin vech-i meşrûh üzre darbını inkâr edicek müdde‘iyye-i [mezbûre] [42a] Fâtıma’dan müdde‘âsını mübeyyine beyyine taleb olundukda müdde‘iyye-i merkūme Fâtıma ityân-ı beyyineden izhâr-ı acz ile istihlâf etmeğin müdde‘iyye-i merkūmeyi ber vech-i muharrer mehrinden fâriğa ol deyû darb etmediğine mezbûr Ahmed’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebiyle meblağ-ı mezkûr talebiyle bî-vech mu‘ârazadan müdde‘iyye-i merkūme Fâtıma’yı men‘ birle mâ vaka‘a bi’t-taleb ketb olundu. Fî selhi Zilhicceti’ş-şerîfe li sene tis‘în ve elf.


Şuhûdü’l-hâl: Hüseyin Çelebi b. Ali, Hasan b. Abdullah, Mehmed b. Eyüb, Mehmed b. Mahmud, Ali b. Abdullah.