|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 275 Hüküm no: 292 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mühtedi Mehmed’in babası Abraham v. Sebetay’ın terekesinden hakkını alması
Havâss-ı Aliyye kazâsına tâbi‘ kasaba-i Hasköy’de Keçeci Pîrî mahallesi ahâlîsinden iken bundan akdem mürd olan Abraham v. Sebetay nâm hâlikin verâseti zevce-i metrûkesi Roşe bt. İlya ile sulbî kebîr oğlu olup helâkinden sonra şeref-i İslâm ile müşerref olan Mehmed nâm mühtedîye ve âhar oğulları Sebetay ve İlya ve Rofail nâm Yahudilere ve sulbiye kızı Kalamode’ye münhasıra olup ba‘dehû kable’l-kısme merkūme Kalamode dahi hâlike olup helâkinden sonra şeref-i İslâm ile müşerref olan mezbûr Mehmed dahi karındaşları merkūmûn Sebetay ve İlya ve Rofail’e münhasıra olup ve tashîh-i mes’eleleri bi hükmi’l-münâsahati’ş-şer‘iyye bin yedi yüz yirmi sekiz sehimden i‘tibâr olunup sihâm-ı mezkûreden iki yüz kırk dört sehmi mezbûre Roşe’ye ve üçer yüz yetmiş birer sehmi dahi mezbûr Mehmed ile merkūmûn Sebetay ve İlya ve Rofail’e isâbet ve intikāl eylediği şer‘an zâhir ve mütehakkik oldukdan sonra mezbûr Mehmed meclis-i şer‘-i şerîfde merkūme Roşe tarafından tasdîk-i âti’z-zikre vekîl-i sâbitü’l-vekâle olan Yako v. İlya nâm Yahudi ile merkūmûn Sebetay ve İlya ve Rofail muvâcehelerinde tav‘an ikrâr-ı tâm ve takrîr-i kelâm edip babam hâlik-i mersûm ve kız karındaşım hâlike-i mezbûrenin nukūd ve urûz ve sâir kalîl ve kesîr ism-i mâl ıtlâk olunur terekesinden bana âid olan hisse-i şer‘iyye-i mezkûremi merkūmûn yedlerinden ahz ve kabz edip hâlikân-ı mezbûrânın terekelerinden benim hisse-i mezbûreme müte‘allika âmme-i de‘âvî ve mütâlebât ve eymân ve muhâsamâtdan merkūmûnun zimmetlerini ibrâ-i âm ve kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sâmin ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Fahrü’l-kuzât Bâlizâde, Ali Efendi b. Mehmed el-İmâm, Hüseyin Bey b. Abdurrahman, Abdullah b. Hasan, Hüseyin Çelebi b. Ali ve gayruhüm.
|