.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 276
Hüküm no: 293
Orijinal metin no: [42b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölü olarak bulunan Mehmed b. Abdullah’ın olay mahallinde muayenesi

Atebe-i aliyye-i sultâniyede bi’l-fi‘l sekbânbaşı olup işbu kitâb-ı sıhhat-nisâbın hâfızı olan iftihârü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’r-refî‘ ve’l-izzi’l-menî‘ Ahmed Ağa hazretleri taraf-ı bâhirü’ş-şereflerinden husûs-ı âti’l-beyâna vekîl-i şer‘î olan Mehmed Ağa b. Derviş meclis-i şer‘-i şerîfe gelip bi’l-vekâle takrîr-i kelâm ve ifâde-i merâm edip târih-i kitâbdan târih bir gün mukaddem müvekkil-i mûmâ-ileyh Ahmed Ağa hazretlerinin Havâss-ı Aliyye kazâsına tâbi‘ Köm[ü]rler tarafından vâki‘ mülk mandıraları kurbunda Uzuncaova semtinde mîrî hâsıl çayırı demekle ma‘rûf mevzi‘de Mehmed b. Abdullah nâm kimesne mecrûhan maktûl bulunmağın taraf-ı şer‘den üzerine varılıp ba‘de’l-keşf ve’l-mu‘âyene vâki‘ hâl ketb ve terkīm olunmak matlûbumdur dedikde cânib-i şer‘-i hatîrden mevlânâ İbrahim Efendi b. Mustafa irsâl olunup ol dahi zeyl-i vesîkada muharrerü’l-esâmî müslimîn ile mevzi‘-i mezkûrda maktûl-i mezbûrun üzerine varıp keşf ve nazar eylelediklerinde sol memesi yanında ve arkasında hışt ve kafasından kılıç ile mecrûh olduğunu mu‘âyene ve müşâhede eylelediklerinde vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Mahmud ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ kayd şüd. Fî gurreti’l-Muharremi’l-harâm li sene ihdâ tis‘în ve elf.


Şuhûdü’l-hâl: El-Hâc Hasan b. Mustafa, el-Hâc Ali b. Mehmed, el-Hâc Mehmed b. ( ), el-Hâc İbrahim b. Mehmed, el-Hâc Ali b. Abdullah, Ali Beşe b. Mehmed, Ali Beşe b. Hasan, Ahmed b. Mehmed, Ali b. Hasan ve gayruhüm.