|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 276 Hüküm no: 294 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed b. Abdullah’ın ev ve tarlalarını Hristo v. Yorgi’ye satması
Vilâyet-i Rumeli’nde livâ-i İnebahtı’da Gerbeniş kazâsına tâbi‘ Alasya nâm karye ahâlîsinden Ahmed b. Abdullah nâm kimesne meclis-i şer‘-i şerîfde işbu râfi‘ü’r-rakīm Hristo v. Yorgi nâm zimmî muvâcehesinde tav‘an ikrâr-ı tâm ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Yorgi v. Franko mülkü ve bir [tarafdan] Franko v. Nikola mülkü ve bir tarafdan Yani v. Beranto mülkü ve bir tarafdan tarîk-i âm ile mahdûd bir bâb saz tahtalı odayı ve zât-ı eşcâr-ı müsmire ve gayr-ı müsmire bahçeyi müştemil menzilimi cemî‘ tevâbi‘ ve levâhıkıyla merkūm Hristo’ya on beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyledikden sonra yine karye-i mezbûre sınırı dâhilinde mevâzi‘-i müteferrikada lede’l-ahâlî ma‘lûmü’l-hudûd yedi kıt‘a tarlalarımın dahi hakk-ı tasarruflarını ma‘rifet-i sâhib-i arz ile mezbûr Hristo’ya on bir buçuk esedî guruş bedel mukābelesinde tefvîz ve ferâğ edip ol dahi minvâl-i muharrer üzre tefevvuz ve kabûl eyleyip semen-i mezbûr ile bedel-i mezkûr ki cem‘an yirmi altı buçuk guruşu merkūm Hristo yedinden tamâmen ahz ve kabz eylediğimden sonra zikr olunan menzil ve tarlaları mahallinde zabt ve tasarrufa mersûm Hristo’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sânî mine’l-Muharremi’l-harâm li sene ihdâ ve tis‘în ve elf.
Şuhûdü’l-hâl: Ahmed Efendi b. Mustafa, Hasan b. Abdullah, Mehmed b. Eyüb, Ali b. Abdullah ve gayruhüm.
|